MƏDƏNİYYƏT
AZAL: hər şey sərnişin üçün
Bakı, 18 aprel, AZƏRTAC
Azərbaycanın milli aviadaşıyıcısı AZAL keçən ilin sonundan ən çox tələb edilən uçuş istiqamətlərində qiymətləri planlı şəkildə aşağı salmağa başladı və şirkətin aşağı büdcəli qanadının yaradılacağını bildirdi. Budur, nəhayət ki, baş tutdu. “Azərbaycan Hava Yolları” bazarın konyunkturasını nəzərə alaraq və sərnişinlərin tələbatının ödənilməsini əsas götürərək, AZALJET brendi adı altında yeni bölmə yaratdı. Bölmə “low cost” seqmentində fəaliyyət göstərəcək. AZAL-ın törəmə şirkətinin hələ martın sonunda elan edilmiş rəsmi debütü aprelin əvvəlində Bakıda keçirilmiş “AITF-2016” Beynəlxalq Turizm Sərgisi çərçivəsində şirkətin stendində baş tutdu.
Səmaya qalxmaq istərdim
Hamımız adət etmişik ki, AZAL-ın əksər reyslərinin, hətta ekonom sinfinin biletinin qiymətinə təyyarədə yemək və müəyyən baqaj norması daxildir. Bu, bir tərəfdən yaxşıdır və çoxlarını razı salırdı. Eyni zamanda, bu cür yanaşma şirkətin qiymətlərdə daha çevik siyasət aparmasına mane olurdu.
Aviaşirkətin aşağı büdcəli bölməsinin yaradılması ilə rəqabətqabiliyyətlilik məsələsi asanlıqla həll edildi. Yemək xidmətinin, baqaj normasının, biletlərin qaytarılması və dəyişdirilməsi və s. ayrı-ayrı opsiyalar AZALJET-ə hətta “low cost” ölçülərində də cəlbedici təkliflər təqdim etməyə imkan yaradır.
İndi, aviabiletin 49 avro baza dəyərini ödəyərək, sərnişin onu rahatlıqla müxtəlif istiqamətlərə aparacaq təyyarədə yer əldə edir. Buraya uçuş müddəti 3,5 saatadək olan Moskva, Dubay, Tbilisi, Sankt-Peterburq, Minsk, Kiyev, Lvov, Tehran, Aktau, Kazan və Mineralnıye Vodı şəhərlərinə, habelə Türkiyənin kurort şəhərləri, o cümlədən İstanbul, Ankara, Antaliya, İzmir, Bodrum və Dalamana uçuş reysləri aiddir.
Bununla yanaşı, ekonom sinfin üç tarif kateqoriyası - “Budget”, “Discount” və “Comfort” əlçatandır. Bu kateqoriyalarda təyyarədə yemək nəzərdə tutulmur və ancaq əl yükü (8 kiloqramadək və ölçüləri 55х35х20 sm) aparmağa icazə verilir. Onların bir-birindən əsas fərqi uçuş vaxtının dəyişdirilməsi və biletlərin qaytarılması imkanlarıdır.
Bununla belə bütün sərnişinlərin yemək və ya baqaj daşıma opsiyalarına əlavə etmək imkanı var. Sadəcə, bileti alarkən istədiyinizi kassirə söyləyin, ya da veb-sayt vasitəsilə sənədləşdirəndə *8880 nömrəsini yığaraq “call center”in operatoruna xəbər verin. Baqajın (23 kiloqramadək) qiyməti əvvəlcədən uçuşa 3 saatdan az qalmadan ödənilərsə, 20 avroya başa gələcək, bu müddəti keçdikdən sonra 5 avro baha olacaq. Sərnişinlərə, həmçinin uçuş vaxtı qəlyanaltı və içki sifariş etmək imkanı yaradılır. Bu isə çox rahatdır.
Sərnişinin hansı tarifi seçməsindən asılı olmayaraq, o, bütün hallarda (mövsümi uçuşlardan başqa) “AZAL Miles” proqramının iştirakçısı olur. Bu barədə ayrıca danışmağına dəyər.
Millər və ballar
“AZAL Miles” proqramı tez-tez uçan sərnişinlər üçün unikal proqram olub, iştirakçılarına aviaşirkət və ya onun agentliklərindən alınmış aviabiletlərin dəyəri əsasında uçuşu və xidmət sinfini müəyyən edin və səyahət balları qazandırır. Səyahət balları şirkətin az qala bütün istiqamətlər üzrə reyslərində pulsuz aviabilet və xidmət sinfinin artırılması ilə əvəz edilə bilər.
“AZAL Miles” proqramının qaydalarında dəyişikliklər son vaxtlar ərzində şirkətin fəaliyyətində daha bir maraqlı yenilik oldu. Son təkmilləşmə ilə əlaqədar olaraq “Səyahət balları”nı (Travel points) “Millər” əvəz etdi. Buna əsasən alınmış hər aviabiletə əsas tarifdən (yığım və vergi nəzərə alınmır) və ya xidmət sinfinin artırılmasına görə ödənilən tarifin hər 1 avro üçün bal hesablanır. Hər avro üçün məsafəyə görə balların miqdarı iştirakçının Classic, Silver, Gold, Platinum statusunu dəyişməsi üzrə artır. Mövcud iştirakçılar üçün hər “Mil” avtomatik olaraq bir “Səyahət balı”na köçürülür.
İkinci fərq “Status balları”nın (Status Points) təqdim edilməsidir. İndi “AZAL Miles” proqramının hər iştirakçısı həm də hər aldığı aviabiletə görə bal əldə edir. “Status balları”nın miqdarı uçuşun müddətindən və səyahətin sinfindən - ekonom və ya biznes olmasından asılıdır. İllik yığılan “Status balları”nın miqdarı sərnişinin növbəti ilə statusunu müəyyən edir.
Yüksək komfortlu uçuş
Sözsüz ki, “Azərbaycan Hava Yolları” aşağı büdcəli brendini ayrıca struktur bölməsi kimi ayırdıqdan sonra öz klassik aviareyslərini, o cümlədən əvvəllər olduğu kimi, baqaj daşınmasını və təyyarədə çoxçeşidli yemək verilməsini davam etdirir.
Bu və digər üstünlüklər rahatlıq və komfortun bir-birini tamamladığı biznes sinfində təqdim edilir.
Biznes sinfində yeməyin seçilməsi və içkilərin assortimenti olduqca müxtəlifdir. Uçuşdan 20 saat əvvəl diabet və ya allergiyadan əziyyət çəkən adamlar, vegeterianlar, müxtəlif dini ənənələrin nümayəndələri xüsusi menyu təqdim edilə bilər. Nəhayət, biznes sinifdə uçan bütün sərnişinlər üçün fərdi əyləncə sistemi, o cümlədən A-340 təyyarələrində kresloya bərkidilmiş 17 düyümlü, B-787 təyyarələrində 10,6 düyümlü displeydə yeni və klassik filmlər, audio, televiziya proqramları, oyunlar, podkastlar və s. əlçatandır. A319/320, B-757 təyyarələrində sərnişinlərə sorğu əsasında AVOD əyləncə sistemi təklif edilir.
Uzunmüddətli uçuşlar zamanı (7 saatdan çox) biznes sinfin sərnişinləri yüksək keyfiyyətli tualet və kosmetik vasitə və aksessuarlardan istifadə edə bilərlər. 2-10 yaşında uşaqlara isə xüsusi hədiyyələr: yol yastığı, yumşaq oyuncaqlar hədiyyə edilir.
Emil Eyyubov
məxsusi olaraq AZƏRTAC üçün