Bakı, 20 iyul, AZƏRTAC

İnsan hüquqları üzrə müvəkkil Elmira Süleymanova Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının (MFP) icrası, təbliği və tətbiqi vəziyyətinin monitorinqi ilə bağlı Abşeron rayonunda ictimai dinləmə keçirib.

Ombudsman Aparatından AZƏRTAC-a bildiriblər ki, əvvəlcə ümummilli lider Heydər Əliyevin abidəsi ziyarət olunub.

Dinləmədə hüquq-mühafizə və ədliyyə orqanlarının, dövlət və icra qurumlarının, ictimaiyyətin nümayəndələri, ziyalılar iştirak ediblər.

Tədbirdə Abşeron Rayon İcra Hakimiyyətinin başçısı İradə Gülməmmədova Prezident İlham Əliyevin dəstək və qayğısı nəticəsində ölkəmizdə, o cümlədən bu rayonda görülən mühüm işlərin əhalinin rifah halının yüksəldilməsinə xidmət etdiyini vurğulayıb, insan hüquqlarının təbliği sahəsində rayonda görülmüş işlər, vətəndaşların hüquq və azadlıqlarının təmini, bu baxımından qarşıda duran vəzifələr, rayonun sosial-iqtisadi inkişafı istiqamətində görülən işlər barədə geniş məlumat verib.

Ombudsman Elmira Süleymanova bütün ölkə ərazisində əhalinin maraqlarına xidmət edən abadlıq-quruculuq işlərinin, müasirləşmə proseslərinin geniş vüsət aldığını, regionların sosial-iqtisadi inkişafı Dövlət Proqramının uğurla həyata keçirildiyini, ölkə iqtisadiyyatının ahəngdar inkişafının insan hüquqlarına birbaşa müsbət təsir göstərdiyini diqqətə çatdırıb.

Müvəkkil vətəndaşlara göstərilən xidmətlərin keyfiyyəti və əlçatanlığı, elektron xidmətlər, habelə bir çox neqativ halların, süründürməçiliyin və problemlərin qarşısının alınması baxımından “ASAN Xidmət” mərkəzlərinin uğurlu fəaliyyətini nümunə göstərib, əhali arasında bu xidmətin yüksək qiymətləndirildiyini qeyd edib.

MFP-nin icrası, təbliği və tətbiqi vəziyyətinə dair məruzə ilə çıxış edən ombudsman, ölkəmizdə yeni və davamlı inkişaf mərhələsində əhalinin maraqlarına xidmət edən mühüm işlərin geniş vüsət aldığını, bunun isə insan hüquqlarına birbaşa təsir göstərdiyini vurğulayıb. Azərbaycanda insan hüquqları sahəsində qəbul olunmuş, strateji əhəmiyyət daşıyan üç mühüm sənəd haqqında danışan E.Süleymanova dövlət müstəqilliyinin ilk illərindən ölkəmizdə həyata keçirilən hüquqi islahatlar, Milli Fəaliyyət Proqramının fəsilləri üzrə mövcud təcrübə, ombudsman təsisatının fəaliyyəti haqqında məlumat verib.

Müzakirələrdə insan hüquq və azadlıqlarının müdafiəsinin səmərəliliyinin daha da artırılması ilə bağlı fikir və təkliflər irəli sürülüb, tədbir iştirakçılarının sualları cavablandırılıb.

Ombudsman Abşeron Rayon Polis Şöbəsinin müvəqqəti saxlama yerinə (MSY) baş çəkib. Saxlanılan şəxslərin saxlanılmasının qanuniliyini təsdiq edən və onların saxlanma şəraitinə aid olan sənədlər araşdırılıb, MSY-nin kameralarına, gəzinti yerinə baxış keçirilib, qidalanma, tibbi yardım, gəzinti, görüş, telefon danışıqları ilə bağlı sənədləşmə yoxlanılıb.

Fərdi qaydada qəbul edilən saxlanılan şəxslərə hüquqları izah olunmaqla müvafiq tövsiyələr verilib. Həmin şəxslər saxlanılma şəraiti və rəftarla bağlı narazılıq etməyiblər. Sonda İşgəncə Əleyhinə Konvensiya və onun Fakültativ Protokolunun tələbləri polis şöbəsinin rəhbərliyinə və əməkdaşlarına izah olunub, habelə saxlanılma şəraitinin daha da təkmilləşdirilməsi tövsiyə edilib.