İQTİSADİYYAT


BMT-Azərbaycan Tərəfdaşlıq Çərçivə Sənədinin İdarəetmə Komitəsinin ilk iclası keçirilib

A+ A

Bakı, 19 yanvar, AZƏRTAC

Birləşmiş Millətlər Təşkilatı-Azərbaycan Tərəfdaşlıq Çərçivə Sənədinin İdarəetmə Komitəsinin ilk iclası keçirilib.

İqtisadiyyat Nazirliyi BMT-Azərbaycan Tərəfdaşlıq Çərçivə Sənədi (UNAPF) üzrə Azərbaycan hökuməti tərəfindən əlaqələndiricidir.

AZƏRTAC xəbər verir ki, iqtisadiyyat naziri Şahin Mustafayev dövlətimizin başçısı tərəfindən həyata keçirilən uğurlu sosial-iqtisadi siyasət nəticəsində Azərbaycanda dinamik inkişafa nail olunduğunu, rəqabətqabiliyyətli və ixracyönümlü iqtisadiyyatın formalaşdırıldığını qeyd edib. İqtisadiyyatın davamlı inkişafının təmin olunması istiqamətində sahibkarlığın daha da inkişaf etdirilməsi məqsədilə bu sahədə aparılan yoxlamalar 2 il müddətinə dayandırılıb, lisenziyaların verilməsi sadələşdirilib, yeni istehsal və iş yerlərinin yaradılması istiqamətində sənaye parkları və zonaları yaradılıb, investisiya mühitinin yaxşılaşdırılması üçün təşviq sənədinin verilməsinə başlanılıb, gömrük sahəsində islahatlar davam etdirilib, xüsusi ixrac missiyaları təşkil olunub, əhalinin sosial müdafiəsinin gücləndirlməsi ilə bağlı tədbirlər görülüb. Yoxsulluğun azaldılması istiqamətində həyata keçirilmiş proqramlar nəticəsində yoxsulluq səviyyəsi 2001-ci ildəki 49 faizdən 2015-ci ildə 4,9 faizə enib. Azərbaycan bu sahədəki uğurlarına görə Ərzaq və Kənd Təsərrüfatı Təşkilatının xüsusi mükafatına layiq görülüb və dünyada 128 ölkə arasında az qidalanma sayının azaldılması məqsədinə nail olan 18 ölkədən biridir. Azərbaycanın BMT-nin İqtisadi və Sosial Şurası kimi mötəbər qurumuna 2017-2019-cu illər üzrə böyük səs çoxluğu ilə üzv seçilməsi ölkəmizin sosial-iqtisadi sahədə son onillikdə əldə etdiyi nailiyyətlərə beynəlxalq səviyyədə verilən yüksək qiymətin göstəricisidir.

Azərbaycan və BMT əməkdaşlığı barədə məlumat verən nazir Şahin Mustafayev əlaqələrin yüksək səviyyədə olduğunu, Azərbaycanın BMT-nin bir çox təşəbbüs və proqramlarına, Minilliyin İnkişaf Məqsədlərinə, həmçinin Davamlı İnkişaf Məqsədlərinə (DİM) qoşulduğunu, Azərbaycanın 2011-ci ildə 2 illik müddətə BMT-nin ali qurumu olan Təhlükəsizlik Şurasının qeyri-daimi üzvü seçildiyini vurğulayıb.

Bununla belə, BMT-Azərbaycan əlaqələri ötən il imzalanan 2016-2020-ci illər üçün Birləşmiş Millətlər Təşkilatı–Azərbaycan Tərəfdaşlıq Çərçivə Sənədi ilə yeni mərhələyə qədəm qoyub. Sənəd hazırlanarkən milli tərəfdaşlarla, inkişaf məsələləri üzrə beynəlxalq partnyorlarla, özəl sektor, vətəndaş cəmiyyəti və elm ictimaiyyətinin nümayəndələri ilə strateji sahələrin müəyyənləşdirilməsi üzrə müzakirələr keçirilib və UNAPF Prezident İlham Əliyev tərəfindən 2012-ci ildə təsdiq edilmiş "Azərbaycan-2020: gələcəyə baxış" İnkişaf Konsepsiyasında və digər sənədlərdə ifadə olunmuş məqsədlərə əsaslanıb. Davamlı İnkişaf Məqsədlərində və UNAPF-da dayanıqlı inkişaf, iqtisadiyyatın şaxələndirilməsi, əhalinin həssas qrupları üçün məşğulluq imkanlarının genişləndirilməsi, keyfiyyətli dövlət və sosial xidmətlərin hamı üçün əlçatanlılığı, sosial baxımdan daha inklüziv və bərabər inkişafa nail olunması, qanunvericiliyin təkmilləşdirilməsi, habelə ətraf mühit və təbii resursların idarə olunması, enerji səmərəliliyi, risk və təbii fəlakətlərə qarşı dayanıqlılıq və s. məsələlər öz əksini tapıb. Nazir Şahin Mustafayev BMT-Azərbaycan Tərəfdaşlıq Çərçivə Sənədinin icrasının ölkəmizin hərtərəfli, dayanıqlı inkişafına və beynəlxalq qurumlarla keçiriləcək birgə fəaliyyətə öz töhfəsini verəcəyini vurğulayıb.

BMT-nin Azərbaycan Respublikasındakı rezident əlaqələndiricisi Qulam İshaqzai Azərbaycanın BMT və bu mötəbər təşkilatın qurumları ilə səmərəli əməkdaşlığını qeyd edib, sənəddən irəli gələn vəzifələr barədə məlumat verib. Q.İshaqzai BMT-Azərbaycan Tərəfdaşlıq Çərçivə Sənədinin hazırlanması zamanı bir sıra maraqlı tərəflərlə - hökumət qurumları, özəl sektor, vətəndaş cəmiyyətləri ilə müxtəlif müzakirələrin aparıldığını, sənəddə digər məsələlərlə yanaşı, inklüzivliyə, cəmiyyətdə gənclərin rolunun artırılmasına, gender bərabərliyinə, milli statistikanın təkmilləşdirilməsinə də xüsusi diqqət yetirildiyini qeyd edib.

İdarəetmə Komitəsinin iclası çərçivəsində birgə iş planları, cari il üçün nəzərdə tutulmuş tədbirlər müzakirə edilib, UNAPF Nəticə Qrupları tərəfindən prioritet sahələr üzrə təqdimatlar keçirilib, UNAPF üzrə İstiqamətləndirici Komitənin tərkibi və UNAPF nəticələr qruplarının səlahiyyət dairələri təsdiq edilib.

Müzakirələrdə Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri İnam Kərimov, əmək və əhalinin sosial müdafiəsi nazirinin müavini İdris İsayev, Ədliyyə Nazirliyinin idarə rəisi Faiq Qurbanov və başqaları çıxış edərək müxtəlif təkliflər səsləndiriblər.

İqtisadiyyat naziri Şahin Mustafayev və BMT-nin Azərbaycan Respublikasındakı rezident əlaqələndiricisi Qulam İshaqzai iclasa yekun vuraraq müzakirələrdə səsləndirilən təkliflərlə bağlı fikirlərini bildiriblər.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.