ELM VƏ TƏHSİL
Bu il Bakı Dövlət Universitetinə 4.798 tələbə qəbul olunub
Bakı, 15 sentyabr, X.Cəfərova, AZƏRTAC
Sentyabrın 15-də Bakı Dövlət Universitetində (BDU) Bilik günü münasibətilə tədbir keçirilib.
AZƏRTAC xəbər verir ki, BDU-nun rektoru, akademik Abel Məhərrəmov universitetin tarixi, müasir inkişaf mərhələlərindən, Prezident İlham Əliyevin çağırışı ilə iqtisadi potensialın intellekt kapitalına çevrilməsi istiqamətində aparılan islahatlardan bəhs edib.
Bu il ali təhsil müəssisələrinə keçirilən qəbul imtahanlarında respublika ali məktəbləri arasında ən çox tələbə qəbulunun Bakı Dövlət Universitetinin payına düşdüyünü deyən rektor cari ildə BDU-ya 4.798 tələbənin qəbul olduğunu, bunun ötən tədris ilindəkindən 526 nəfər çox olduğunu bildirib. Rektor qeyd edib ki, qəbul imtahanında 600 və daha yüksək bal toplayanlardan 299-u, ümumilikdə isə 500-700 arası bal toplayan 1296 nəfəri Bakı Dövlət Universitetini seçib. Bu il universitetin bakalavriat və magistratura pillələrində yeni ixtisas və ixtisaslaşmalar açıldığını diqqətə çatdıran rektor BDU-nun Qazax filialına səkkiz ixtisas üzrə tələbə qəbulu aparıldığını, həmin ixtisaslardan turizm və otelçilik, ekologiya və biologiya müəllimliyinin yeni olduğunu bildirib.
Jurnalistika fakültəsinin dekanı vəzifəsini icra edən, professor Cahangir Məmmədli tələbələri və onların valideynlərini təbrik edib.
Üçüncü ixtisas qrupu üzrə 700 bal toplayan Elvin İsayev bildirib ki, Bakı Dövlət Universiteti Şərqin ilk dünyəvi ali məktəbi və regionun ən nüfuzlu universitetidir. Eyni zamanda, xalqımızın taleyində mühüm rol oynamış ali təhsil müəssisəsidir.
A.Məhərrəmov universitetə yüksək balla daxil olan gənclərə tələbə vəsiqələri, universitetin tarixini əks etdirən bukletlər təqdim edib.
BDU-nun nəzdində fəaliyyət göstərən “Gənc istedadlar” liseyində də Bilik günü keçirilib. Akademik A.Məhərrəmov tədbirdə iştirak edən müəllim və şagirdləri təbrik edib. Rektor builki lisey məzunlarından iki nəfərin qızıl, dörd nəfərin isə gümüş medala layiq görüldüyünü, məzunların əksəriyyətinin nüfuzlu ali məktəblərə qəbul olunduqlarını, bu il liseyin beşinci sinfinə qəbul olunmuş şagirdlərin də etimadı doğruldacaqlarını, universitetə şərəf gətirəcəklərinə ümid etdiyini bildirib.
Liseyin direktoru, professor Qasım Hüseynov yeni dərs ilinin başlanması münasibətilə təbriklərini çatdırıb, bu təhsil ocağının uğurlarından bəhs edib.
Sonda 2016-2017-ci tədris ilinin ilk zəngi səslənib.