Bakı, 16 avqust, Flora Şükürova, AZƏRTAC

AZƏRTAC daha bir istedadlı gənclə bağlı hazırladığı müsahibəni oxuculara təqdim edir. Budəfəki müsahibimiz gənc bəstəkar Tural Məmmədlidir.

Bilirik ki, musiqiçi ailəsində dünyaya göz açmısınız, niyə ifaçılığa yox, bəstəkarlığa üstünlük verdiniz?

- İlk növbədə deməliyəm ki, musiqi bəstələmək uşaqlıq arzum olub. Sonradan bu istiqamətdə təhsil aldım, Üzeyir Hacıbəyli adına Bakı Musiqi Akademiyasında görkəmli pedaqoqlardan sənətin sirlərini öyrəndim. Yüksək təhsil görmədən yaxşı bəstəkar olmaq mümkünsüzdür. Mən yalnız mahnı bəstələmirəm. Yaradıcılığımda ciddi, klassik əsərlər də mühüm yer tutur.

Daha çox hansı bəstəkarın üslubundan bəhrələnirsiniz?

- Başda Üzeyir bəy Hacıbəyli olmaqla demək olar ki, bütün klassik musiqi bəstəkarlarımızın yaradıcılığından yararlanmağa çalışmışam və indi də çalışıram. Xüsusilə dahi Qara Qarayevin yaradıcılığını özüm üçün baza hesab edirəm.

Bu günə kimi neçə mahnı bəstələmisiniz və ifaçıları kimlərdir?

- Ümumilikdə 50-dən çox əsərin müəllifiyəm. Buraya həm simfonik, həm simli orkestr, tamaşa, simli kvartet, ansambllar, solo alətlər üçün əsərlər və mahnılar daxildir. Mahnılarımın və əsərlərimin ifaçıları arasında kifayət qədər tanınmış simalar var.

Bayağı mahnıların çoxluğu bir bəstəkar kimi sizi həvəsdən salmırki?

-Belə mahnıların səsləndirilməməsi daha yaxşı olardı. Amma müasir internet əsrində bu çətin məsələdir. İstənilən musiqini dinləyiciyə daha dolğun və zövqlü formada təqdim etmək mümkündür. Bu isə müəllifin zövqündən, intellektual səviyyəsindən, musiqi təfəkküründən asılıdır. Ona görə də bayağı musiqinin olduğunu düşünmürəm, sadəcə olaraq işinə laqeyd yanaşan insanlar var.

Türkiyəli sənətçilər ara-sıra bizim bəstəkar mahnılarına müraciət edirlər. Siz necə, onlarla işbirliyi barədə düşünürsünüzmü?

-Bir qısametrajlı film və serialdan təklif almışam. Hazırda onları dəyərləndirirəm.

Son illər ölkəmizdə milli musiqinin inkişafına, təbliğinə göstərdiyi diqqət və qayğı danılmazdır. Məhz bunun nəticəsidir ki, hər il Azərbaycanda onlarla beynəlxalq müsabiqə, festival keçirilir. Bir gənc bəstəkar olaraq belə festivallar uçun əsər yazmağı düşünürsünüzmü?

- Əlbəttə. Musiqiyə dövlət qayğısı olduqda o öz səmərəsini daha qabarıq şəkildə büruzə verir. Əsərlərim bir çox festivallarda səslənib. Məsələn, Bakıda "Gəncliyin səsi" incəsənət festivalında, ABS-ın Texas ştatında, Vyana, Budapeşt, Balatonfuret, Valetta, Moskva, Istanbul, Tehran və s. şəhərlərdə.

Sonda gələcək planlarınızdan danışardınız.

-Gələcək planlarım barədə onu deyə bilərəm ki, daima öz üzərimdə işləyirəm. Bunu sözdə demək istəməzdim. Konkret hədəflərim var və inanıram ki, onlara çatacağam. Berlində "Utapia" adlı beynəlxalq layihə həyata keçirilir. Burada rəsm, foto, film və musiqi müsabiqələri nəzərdə tutulur. Bu müsabiqədə Azərbaycanı təmsil edəcəyəm. Bu layihəyə çox ciddi hazırlaşıram.

Sizə yeni-yeni uğurlar arzulayırıq.