MƏDƏNİYYƏT


Gənc heykəltəraş-rəssamın arzuları

Bakı, 4 fevral, Ceyhun Alışlı, AZƏRTAC

Min illərlə yaşı olan heykəltəraşlıq sənəti bəşər tarixinin canlı şahidi olmaqla yanaşı, həm də insanların ətraf aləmə bədii estetik münasibətinin ifadəsidir. Təsadüfi deyildir ki, heykəltəraşlıq – sənətkarın nəcib əməllərini, ad-sanını əsrlər boyu yaşadan ən gözəl sənət növlərindən sayılır. İnsan şəxsiyyətini arxivləşdirən, onu tarixin yaddaşına əbədi həkk edən bu şərəfli sənətdə heykəlləşən şəxsiyyətlər və sənətkarlar az-az olur. Bu sahədə elə sənətkarlarımız var ki, yaratdıqları sənət əsərləri ilə tarix yazıblar. Onların sənət yolu bu gün də istedadlı gənc heykəltəraşlar tərəfindən uğurla davam etdirilir. Belə gənclərdən biri də Azad Aslanovdur. AZƏRTAC-ın müxbiri adını Azərbaycan heykəltəraşlıq sənətinin böyük simaları sırasına yazdırmaq iddiasında olan gənc heykəltəraş-rəssam Azad Aslanovla həmsöhbət olub.

- Sizdə incəsənətə maraq haradan yaranıb?

- Uşaqlıqdan bu sahəyə marağım böyük idi. Hətta 4-5 yaşımda rənglərə olan həvəsim, fırça ilə işləməyim gündəlik vərdişə çevrilmişdi. Bəlkə də özüm də bilmədən bu həvəs məni incəsənətə gətirib çıxardı. Yetkinlik yaşıma çatanda artıq tətbiqi-dekorativ və heykəltəraşlıq janrlarında nələrsə yaratmağa can atırdım. Bu, məndə alınırdı. Ərsəyə gətirdiyim hər bir iş məni gündən-günə ruhlandırdı. Düşünürəm ki, incəsənətə olan bağlılığımın kökü buradan qaynaqlanır.

- Hazırda Azərbaycan Dövlət Rəssamlıq Akademiyasının heykəltəraşlıq fakültəsinin birinci kurs tələbəsisiniz. Artıq professional incəsənətə gedən istiqamətin astanasındasınız. Gələcək planlarınızın bölgüsünü necə aparırsınız?

-Əvvəlcə onu deyim ki, planlarımı hələ Əzim Əzimzadə adına Rəssamlıq Məktəbində (indiki İncəsənət Kolleci) təhsil alarkən düşünmüşəm. Deyə bilirəm ki, hazırda Dövlət Rəssamlıq Akademiyasında təhsil almağım da məhz o planlarımın tərkib hissəsidir. Heykəltəraşlıq sahəsi olduqca çətin, eyni zamanda maraqlı sahədir. Bundan sonrakı sənət fəaliyyətim bu sahəni özümdə inkişaf etdirməyə yönəlib. Bunun üçün lazım olan hər bir yeniliyi öyrənməyə can atıram. Yeni-yeni işlər ərsəyə gətirirəm. Çalışıram ki, istər ölkə daxilində, istərsə də ölkənin hüdudlarından kənarda reallaşan festival və müsabiqələrə qatılım. Müəyyən mənada buna nail olmuşam. Uğurlarım da var və bu, hələ ki, başlanğıcdır. Beynəlxalq incəsənət festivallarında qazandığım nailiyyətlər bir azərbaycanlı gənc kimi məni ruhlandırır. Əlbəttə, bu yöndə səylərimi davam etdirəcəyəm.

- Bəlkə uğurlarınızı bizimlə də bölüşəsiniz?

- Böyük məmnuniyyətlə. Bu yaxınlarda Rusiyanın Yekaterinburq şəhərində gənclər arasında təşkil olunmuş “Arzuların rəngarəngliyi” adlı Beynəlxalq Virtual Sərgiyə qatıldım. Sərgiyə təqdim etdiyim “Casusların öpüşü” əsərim birincilik qazandı və diplomla təltif olundum. Bundan başqa, Ç.Darvin adına Moskva Dövlət Muzeyində gerçəkləşən beynəlxalq müsabiqədə “Pişiyin doqquz canı” adlı əsərimlə birincilik qazandım. O müsabiqədə üç nəfər birincilik qazanmışdı, onlardan biri də mən idim. Daha sonra “Almaniya bir rəssamın gözü ilə” müsabiqəsində də müəyyən uğurlarım oldu, diplomla təltif edildim. Əlbəttə, uğurlarımın çoxluğu məni daha böyük əzmlə işləməyə həvəsləndirir.

- Yəqin ki, bu yolda sizə dəstək olan müəllimləriniz var. Onların məsləhətindən yetərincə faydalana bilirsinizmi?

- Təhsil aldığım akademiyada respublikamızın tanınmış heykəltəraş-rəssamları dərs deyir. Mən də sənət ilhamımı o sənətkarlardan almağa can atıram. Hələ Əzim Əzimzadə adına Rəssamlıq Məktəbində təhsil aldığım vaxtlarda tanınmış heykəltəraş-rəssamımız Əhməd Bədəlovdan çox şeylər öyrəndim. İndi də akademiyada müəllimim Rahib Qarayevdən sənətin sirlərini öyrənirəm. Ümumiyyətlə, akademik Ömər Eldarovun rəhbərlik etdiyi akademiyada olduqca şəffaf mühit yaradılıb ki, bu da sənətinə qırılmaz tellərlə bağlanmaq həvəsi olan hər bir istedadlı gənci davamlı nailiyyətlərə səsləyir. Bu, gələcək hədəflərimizə çatmaq üçün bizdə ruh yüksəkliyi yaradır.

-Hazırda hansı işlər üzərində çalışırsınız?

- “Dayanacaqda cazmenlər taksi gözləyirlər” adlı abstrakt üslublu bir əsər üzərində işləyirəm. Bu əsərimlə bir çox beynəlxalq festivallara qatılmaq niyyətindəyəm. Bundan əlavə, yaxın gələcəkdə Nyu-Yorkda yerləşən Müasir İncəsənət Mərkəzində və İtaliyada baş tutacaq “Venesiya Biennalesi” - Beynəlxalq İncəsənət Sərgisinə qatılmağı planlaşdırıram. Artıq indidən sözügedən beynəlxalq sərgilərə hansı əsərlərimlə qatılacağımı nəzərdən keçirirəm.

-Gələcəkdə kimin heykəlini yaratmaq istəyərdiniz?

-Toxunduğunuz mövzu ilə bağlı illərdir ki, düşünürəm. Əslində, hansısa bir tarixi şəxsiyyətin heykəlini yaratmaq istəyim hələ ki, yoxdur. Bu yöndə görəcəyim işləri zamanın öhdəsinə buraxıram. Ancaq hazırkı arzum Aleksandr Dümanın “Dəmir maskalı adam” əsərində maskalı adam obrazını heykəlləşdirəcəm.

Maraqlı müsahibə üçün təşəkkür edirik.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.