İQTİSADİYYAT


Gömrük orqanlarına təqdim edilən zaman malların dəyərini aşağı göstərən şirkətlərin adları açıqlanıb

A+ A

Bakı, 22 dekabr, AZƏRTAC

Dövlət Gömrük Komitəsi tərəfindən son dövrlərdə sahibkarlar və müxtəlif şirkətlər tərəfindən idxal əməliyyatları zamanı gömrük orqanlarına təqdim edilən bir sıra invoyslar üzrə aparılan araşdırma zamanı malların dəyərindən dəfələrlə aşağı göstərildiyi müəyyən edilib.

Dövlət Gömrük Komitəsinin mətbuat xidmətindən AZƏRTAC-a bildirilib ki, ölkəmizdə sahibkarlıq mühitinin yaxşılaşdırılması, idxal-ixrac əməliyyatlarının sürətli və şəffaf şəkildə həyata keçirilməsi, beynəlxalq ticarət zəncirinin davamlığının təmin edilməsinin əsas şərtlərindən biri də gömrük-biznes əməkdaşlığının gücləndirilməsi, yəni sahibkarlarla gömrük orqanları arasında işgüzar əlaqələrin inkişaf etdirilməsidir. İqtisadi təhlükəsizliyin təmin olunması, fiskal siyasətin həyata keçirilməsində mühüm rol oynayan gömrük orqanları bu məqsədlə mütəmadi olaraq sahibkarlarla, biznes nümayəndələri ilə görüşlər, dəyirmi masalar keçirir, tətbiq olunan yeniliklər, beynəlxalq ticarətin inkişaf etdirilməsindəki yeni çağırışlar barədə onları məlumatlandırır, iş adamlarını maraqlandıran suallara cavab verilir və qarşıya çıxan problemlər, ümumi işə zərər verən amillərin aradan qaldırılması istiqamətində operativ və qətiyyətli addımlar atılır. Son illərdə tətbiq edilən “Bir pəncərə”, “Elektron bəyannamə”, “Yaşıl dəhliz” və digər yeni tətbiqlərin sahibkarlıq mühitinin yaxşılaşdırlıması, idxal-ixrac əməliyyatlarının şəffaf və sürətli həyata keçirilməsindəki rolu danılmazdır.

Qarşılıqlı müzakirə şəraitində keçirilən bu görüşlərdə o da vurğulanır ki, xarici iqtisadi fəaliyyət nəticəsində qanunvericiliyə əsasən tətbiq olunan vergi və rüsumlar dövlət büdcəsinə ödənilməklə ölkəmizin iqtisadi tərəqqisinə, müdafiə qabiliyyətinin güclənməsinə, sosial problemlərin həllinə, vətəndaşların rifah halının yaxşılaşdırılmasına sərf olunur.

Sahibkarlarla keçirilən görüşlərdə və kütləvi informasiya vasitələrində aparılan mütəmadi təbliğat işinə, dəfələrlə edilən xəbərdarlıqlara baxmayaraq, hələ də bir sıra xarici iqtisadi fəaliyyət iştirakçıları - hüquqi və fiziki şəxslər gömrük rəsmiləşdirilməsi zamanı müvafiq gömrük orqanlarına təqdim etdikləri invoysda idxal etdikləri malların dəyərini aşağı göstərməklə dövlət büdcəsinə ödəniləcək gömrük vergi və rüsumlarından yayınmağa çalışır.

Dövlət Gömrük Komitəsi bir daha xatırladır ki, ölkəmizin gömrük orqanları və gömrük əməkdaşları gömrük sərhədindən keçirilən malların və nəqliyyat vasitələrinin fiziki, kimyəvi, bioloji və digər əlamətləri ilə yanaşı, onun dəyərini müəyyən etmək üçün də müvafiq alət, mexanizm və biliklərə malikdir.

Son dövrlərdə sahibkarlar və müxtəlif şirkətlər tərəfindən idxal əməliyyatları zamanı gömrük orqanlarına təqdim edilən bir sıra invoyslar üzrə aparılan araşdırma zamanı malların dəyərindən dəfələrlə aşağı göstərildiyi müəyyən edilib.

Bu sahibkar və şirkətlərin siyahısı

 

Xarici iqtisadi fəaliyyət iştirakçısının adı

İnvoysda göstərilən qiymət

Real qiymət

Fərq

1

“Taleh-AT” müəssisəsi

67350,01

ABŞ dolları

129915,13

ABŞ dolları

62565,12

ABŞ dolları

2

“Qoşabulaq-A” MMC

26000 avro

70000 avro

44000 avro

3

Bəhlulzadə Kamal Rauf o.

6584

ABŞ dolları

28044

ABŞ dolları

21460

 ABŞ dolları

4

“Avantaj AS” MMC

46188,60

 ABŞ dolları

65027,06

 ABŞ dolları

18838,46

ABŞ dolları

5

“NTC Company” MMC

24584,85

ABŞ dolları

38216

ABŞ dolları

13631,15

 ABŞ dolları

6

“Çipto” MMC

7028,98avro

17180,32 avro

10151,34 avro

7

“ABA Trading” MMC

27700 avro

37500 avro

9800 avro

Siyahıdan da göründüyü kimi, ümumilikdə 116 494,73 ABŞ dolları və 63 951,34 avro vəsaitin gömrük vergi və rüsumlarına cəlb olunmasından yayındırılmağa cəhd göstərildiyi müəyyən edilib və təəssüf ki, bu kimi hallar davam edir.

Dövlət Gömrük Komitəsi bu halların qarşısının alınması üçün daim qətiyyətli addımlar atır və bildirir ki, gələcəkdə müxtəlif üsullarla dövlət büdcəsinə çatacaq vəsaiti ödəməkdən yayınmağa cəhd göstərən fiziki və hüquqi şəxslər haqqında qanunvericiliyə uyğun olaraq müvafiq tədbirlər görülməklə yanaşı, onların adları da mütəmadi olaraq KİV vasitəsilə ictimaiyyətə açıqlanacaq.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.