Masallı, 27 iyul, Bağır Əliyev, AZƏRTAC

Masallı şəhərindəki Heydər Əliyev Mərkəzində bu ilin altı ayında rayonun sosial-iqtisadi inkişafının yekunları və qarşıda duran vəzifələrə həsr olunmuş hesabat yığıncağı keçirilib.

AZƏRTAC xəbər verir ki, yığıncaqda rayon icra hakimiyyətinin başçısı Rafil Hüseynov hesabat məruzəsi ilə çıxış edib. Bildirilib ki, 2015-ci ilin birinci yarısı sosial-iqtisadi inkişaf göstəricilərinə görə uğurlu olub, yeni iş yerlərinin yaradılması, tikinti-quruculuq, abadlıq işlərinin sürətlə davam etdirilməsi üçün ardıcıl tədbirlər həyata keçirilib.

Qeyd olunub ki, Masallı şəhərindəki Nizami Gəncəvi, “Qurtuluş”, R.Abbasov küçələri genişləndirilib, yeni səkilərin salınması, müasir işıqlandırma sistemlərinin qurulması və yaşıllıq zolağının salınması, şəhərin mərkəzi küçələrinin 7 kilometrində asfaltlanma işləri başa çatdırılıb. Viləş park-bulvar kompleksinin tikintisi isə davam etdirilir.

Masallının giriş qapısında Bayraq Meydanı yaradılır, Nizami küçəsi yenidən qurulur, rayon məhkəməsi, regional “ASAN xidmət”, mühafizə və kənd təsərrüfatı idarəsi üçün binaların tikintisi həyata keçirilir.

Bildirilib ki, bu ilin birinci yarısında rayon məşğulluq mərkəzinə 137 nəfər işaxtaran müraciət edib, onlardan 86 nəfəri işlə təmin olunub. Bu dövrdə sənaye məhsullarının həcmi 1,8 faiz, kənd təsərrüfatı istehsalı 2 faiz, pullu xidmətin həcmi 5,7 faiz artıb. İlin birinci yarısında rayonda qaramalın sayı 73 min 395 baş, davarların sayı isə 82 min 542 baş olub. Hesabat dövründə süd istehsalı 26 min 826,6 tona, ət istehsalı 3 min 198,8 tona, yumurta tədarükü 35 min 157 minə çatıb. 11 min 891 hektar taxıl, 1282 hektar kartof, 515 hektar bostan, 2541,3 hektar tərəvəz əkilib.

Diqqətə çatdırılıb ki, Masallıda “Kənd təsərrüfatı ili” çərçivəsində aqrar sahənin inkişafı ilə bağlı tədbirlərin görülməsi, tərəvəzçiliyin inkişafı, yeni çay plantasiyalarının salınması, istixanaların quraşdırılması, çiyələk, kivi təsərrüfatlarının yaradılması həlli vacib layihələrdəndir. “Yaşıl market”in yaradılması bu problemin həllində əhəmiyyətli rol oynayacaq. Qızılağac və Kolatan kəndlərində “Azərsun” Holdinq tərəfindən 100 hektar tərəvəz və 100 hektar çay plantasiyası salınıb ki, bu da həmin sahələr üzrə ciddi inkişafdan xəbər verir. Tərəvəzçilikdə 300 yeni iş yeri açılıb. Yaxın gələcəkdə bu sahəni min hektara, çay plantasiyalarını 1200-1400 hektara çatdırmaq nəzərdə tutulub. Bu, çayçılıqda yaxın vaxtda 500 yeni iş yerinin açılması deməkdir.

Regionların sosial-iqtisadi inkişafına dair üçüncü Dövlət Proqramı çərçivəsində rayon mərkəzinə və 22 yaşayış məntəqəsinə birpilləli sistem üzrə qaz xəttinin çəkilməsinə başlanıb.

Hesabat dövründə Qədirli, Xallıcallı, Kolatan, Səmidxan və Ətcələr kəndlərinin qaz xətti istifadəyə verilib. Hazırda Xıl, Sərçuvar, Yeddioymaq, Qasımlı, Şıxlar, Təzəkənd, Öncəqala, Hüseynhacılı kəndlərində bu iş davam etdirilir.

Hazırda Masallı şəhərinə içməli su və kanalizasiya, eləcə də Muğan zonası və Qızılağac istiqamətində 42 kəndə su xətti çəkilir. Mənbəyini Viləşçay anbarından alan bu xətt vasitəsilə kəndlərin bir neçəsi ilin sonunadək keyfiyyətli içməli su ilə təmin olunacaq.

Hesabat yığıncağında çıxış edənlər bu ilin birinci yarısında rayonda sosial-iqtisadi inkişaf sahəsində görülən işlərdən, həyata keçirilən layihələrdən söhbət açaraq mövcud problemlərlə bağlı təkliflərini bildiriblər.