CƏMİYYƏT


Müdafiə Sənayesi Nazirliyinin müəssisələri ilə Türkiyə şirkətləri arasında niyyət protokolları imzalanıb

Bakı, 12 may, AZƏRTAC

Mayın 9-dan 12-dək Türkiyənin İstanbul şəhərində keçirilən və Müdafiə Sənayesi Nazirliyinin (MSN) də təmsil olunduğu “IDEF-2017” XIII Beynəlxalq müdafiə sənayesi sərgisi çərçivəsində nazirliyin Elmi Tədqiqat İnstitutu, “Optika-Mexanika” və “Cihaz” istehsalat birlikləri ilə Türkiyənin “ASELSAN” və “TUSAŞ” şirkətləri arasında müdafiə təyinatlı məmulatların birgə istehsalına dair niyyət protokolları imzalanıb.

MSN-dən AZƏRTAC-a bildiriblər ki, sərgi çərçivəsində nazir Yavər Camalovun nazirliyin stendini ziyarət edən Pakistanın müdafiə sənayesi federal naziri Rana Tanvir Hussain və digər ölkələrin nümayəndə heyətlərinin rəhbərləri ilə görüşləri olub. Görüşlərdə müdafiə sənayesi üzrə yeni əməkdaşlıq əlaqələrinin yaradılması, mövcud əlaqələrin inkişafına dair danışıqlar aparılıb və ümumi razılıqlar əldə olunub.

Müdafiə sənayesi naziri Yavər Camalovla görüşündən sonra MSN-in stendini ziyarət edən Türkiyənin milli müdafiə naziri Fikri İşıq nümayiş etdirilən məmulatlarla yaxından tanış olub. İki qardaş ölkənin müvafiq qurumları arasındakı konkret sahələr üzrə birgə əməkdaşlıqdan məmnunluğunu ifadə edən Fikri İşıq bu əlaqələrin davamlı olması üçün yeni sahələrin müəyyənləşdirilməsi məqsədilə aparılan danışıqların əhəmiyyətini də vurğulayıb.

ABŞ, Almaniya, Rusiya, Fransa, İngiltərə və digər inkişaf etmiş ölkələrdən 300-dək qabaqcıl şirkətin qatıldığı “IDEF-2017” sərgisində Azərbaycanın Müdafiə Sənayesi Nazirliyinin nümayiş etdirdiyi, yerli mütəxəssislər tərəfindən hazırlanmış “Tufan” milli zirehli maşını, “Vaşaq” snayper tüfəngi və digər məmulatlar böyük marağa səbəb olub.

Müxtəlif ölkələrin müdafiə sənayesi şirkətlərinin silah, texnika və hərbi avadanlıq istehsalı sahəsində əldə etdikləri nailiyyətlərlə tanış olmaq məqsədilə keçirilən beynəlxalq müdafiə sərgilərində son illər təmsil olunan və artıq belə tədbirlərin təşkilatçısına çevrilən Müdafiə Sənayesi Nazirliyinin qatıldığı hər bir sərgidə nümayiş etdirdiyi yeni nəsil məmulatlar izləyicilər tərəfindən böyük maraqla qarşılanır. MSN-in təmsil olunduğu belə sərgilərdən biri də İstanbulda keçirilən “IDEF-2017” XIII Beynəlxalq müdafiə sənayesi sərgisi olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.