ELM VƏ TƏHSİL
ÖLKƏMİZİN ALİ MƏKTƏBLƏRİNƏ QƏBUL OLANLARIN SİYAHISI “ABİTURİYENT” JURNALINDA AÇIQLANMIŞDIR
Qəbul qaydalarının 8-ci bəndinə əsasən ali məktəblərin bütün şöbələrinə (əyani, axşam, qiyabi) qəbul olan abituriyentlər avqustun 20-dək sənədlərini daxil olduqları təhsil müəssisəsinə təqdim etməli, TQDK-nın ali məktəblərə göndərdiyi qəbul olunanların siyahısında mütləq imza etməklə qeydiyyatdan keçməlidirlər. Həmin müddətdə qeydiyyatdan keçməyən abituriyentlər ali məktəbə qəbul olanlar sırasından xaric ediləcək və onların qəbul haqqında əmrləri ali məktəbə göndərilməyəcəkdir.
Ali məktəblərə qəbul olunmayan abituriyentlər sənədlərini bilavasitə təqdim etdikləri sənəd qəbulu komissiyalarından öz imtahan nəticələri haqqında TQDK-nın arayışını ala bilərlər. Arayışda hər bir imtahan fənnindən etalon cavabların siyahısı, abituriyentin fənlər üzrə düzgün və yanlış cavabları, nisbi balları, həmçinin seçdiyi ixtisasların aid olduğu altqruplar üzrə topladığı ballar və həmin ixtisaslar üzrə minimum keçid balları haqqında məlumatlar göstərilmişdir. Arayışlar pulsuz verilir.
Həmin abituriyentlərin nəzərinə çatdırılır ki, bu arayışdakı göstəricilərdə onların ali məktəbə qəbul olmamaqlarının səbəbləri tam açıqlanmışdır. Bu göstəricilərlə sadəcə olaraq diqqətlə tanış olmaq vacibdir.
TQDK tərəfindən təşkil olunmuş apelyasiya, ali məktəblərin boş qalan yerlərinə əlavə yerləşdirmə və orta ixtisas məktəblərinə birinci mərhələ üçün sənəd qəbulu komissiyaları avqustun 14-dən 18-dək şənbə və bazar günləri daxil olmaqla hər gün saat 9-dan 18-dək fəaliyyət göstərəcək. Apellyasiya komissiyasının tərkibində test metodikası şöbəsinin işçilərindən və mütəxəssis müəllimlərdən ibarət işçi qrupu abituriyentlərə testlərin məzmunu və imtahanın nəticələri haqqında izahat verəcəkdir. Apellyasiya komissiyalarına müraciət edən abituriyentlər öz imtahan nəticələri barədə tam və dürüst məlumat ala bilərlər. Apelyasiya və sənəd qəbulu komissiyaları Azərbaycan bölməsi üzrə - I qrup - Azərbaycan Tibb Universitetinin idman kompleksi, I I qrup - Bakı Asiya Universiteti, III qrup - Bakı Biznes Universiteti, IV qrup - Odlar Yurdu Universiteti, V qrup - Bakı Ali Pedaqoji Qızlar Seminariyası, rus bölməsi üzrə bütün qruplar - TQDK-nın binasında təşkil olunmuşdur.
Apelyasiya, həmçinin Kürdəmir, Sumqayıt, Yevlax, Şəki, Lənkəran, Xanlar, Şamaxı, İmişli, Quba, Gəncədə fəaliyyət göstərən informasiya mərkəzlərində də aparılır.
Abituriyent apelyasiya komissiyasına şəxsən özü gəlməlidir. Burada iştirak etmək üçün şəxsiyyət vəsiqəsi təqdim olunmalıdır. Apelyasiyaya abituriyentin qohumu, dostu, tanışı və başqa şəxslər buraxılmır. Ali məktəblərə qəbul qaydalarının 10-cu bəndinə əsasən bir ali məktəbdən başqasına köçürülmək, təhsil formasını və ya ixtisasını dəyişdirmək və təhsil haqqının ödənilməsi ilə bağlı müraciətlərə baxılmır. Həmçinin apelyasiya müddəti başa çatdıqdan sonra imtahanlarla bağlı heç bir şikayətə baxılmır.