SİYASƏT
Tbilisidə QDİƏT Parlament Məclisinin komitə iclası keçirilir
Tbilisi, 11 aprel, AZƏRTAC
Aprelin 11-də Tbilisidə Qara Dəniz İqtisadi Əməkdaşlıq Təşkilatı Parlament Məclisinin (QDİƏT PM) iqtisadiyyat, ticarət, texnologiya və ekologiya məsələləri üzrə komitəsinin 48-ci iclası öz işinə başlayıb.
Komitə sədrinin müavini, Yunanıstan nümayəndə heyətinin rəhbəri Sofiya Vultepsi tədbiri açaraq deyib ki, bu gün dünyada alternativ enerjiyə tələbat artır. Ənənəvi enerji resursları tükənir və yaxın illərdə dünya ölkələrinin əksəriyyəti alternativ enerji mənbələrindən istifadə edəcək. Bu tədbirdə də əsasən enerji resurslarından səmərəli istifadə, alternativ enerji hasilatı və istifadəsi ilə əlaqəli layihələrin hazırlanması, reallaşdırılması, bioenerjidən istifadə, bu sahədə beynəlxalq təcrübə və s. məsələlər müzakirə olunacaq.
Gürcüstan parlamentinin aqrar siyasət komitəsinin sədri Otar Daneliya, energetika nazirinin müavini Mariyam Beliaşvili və başqaları çıxış edərək müzakirə olunacaq məsələlərlə bağlı fikirlərini bölüşüblər.
QDİƏT PM-in baş katibi Asəf Hacıyev çıxışında regionda və dünyada gedən proseslərə toxunub, enerji təhlükəsizliyi, alternativ enerjidən istifadə və s. məsələlər barədə məlumat verib.
Toplantıda Azərbaycan nümayəndə heyətinin üzvü, Milli Məclisin deputatı Əflatun Amaşov quruma üzv ölkələrdə yeni enerji mənbələrinin inkişafı mövzusunda məruzə ilə çıxış edib.
Deputat bildirib ki, Qara dəniz regionu enerji daşıyıcılarının dünya bazarına çıxarıldığı başlıca strateji regiondur. Buna görə də enerji məsələləri bölgənin taleyində mühüm yer tutur. Regionun təbii imkanları neft və qaz kimi ənənəvi enerji resursları ilə yanaşı, alternativ mənbələrə də müraciət üçün yol verir. Bu, həm də ona görə vacibdir ki, artıq dünya ictimaiyyətini iqlim dəyişikliyi, ekoloji problemlər, yaşıllıqların qırılması və s. məsələlər ciddi şəkildə narahat etməyə başlayıb. Mövcud amil Avropa İttifaqı və digər mötəbər təşkilatların hesabatlarında da əksini tapır.
Ə.Amaşov qeyd edib ki, energetika sahəsindəki qlobal tendensiyalar regionun, ümumilikdə isə Avrasiya materikinin yeni enerji xəritəsinin formalaşmasını zərurətə çevirməkdədir. Ancaq perspektiv planların tam şəkildə reallaşması üçün bölgənin ekoloji təmizliyinin təminatı da mütləqdir. Bütün bunlar enerji siyasətinin insan rifahına zərər gətirməyən yeni texnologiyalardan bəhrələnməklə həyata keçirilməsini mühüm vəzifə kimi müəyyənləşdirməkdədir. Deputat çıxışında, həmçinin dünyada artan enerji tələbatlarındakı statistik rəqəmlər, Azərbaycanın Avropanın enerji təhlükəsizliyindəki rolu və sair məsələlər barədə danışıb.
Tədbirdə, habelə QDİƏT-in carı fəaliyyəti barədə məlumat veriləcək, bir sıra təşkilati məsələlərə baxılacaq.
İclasda Azərbaycanın Gürcüstandakı səfiri Dursun Həsənov iştirak edib.
Xətayi Əzizov
AZƏRTAC-ın xüsusi müxbiri
Tbilisi