SİYASƏT
Tolerant Azərbaycan İsrailin Or Akiva şəhərində
Bakı, 27 noyabr, AZƏRTAC
Or Akiva şəhəri İsrailin elə şəhərlərindəndir ki, burada əslən Qafqazdan olanların icması nəinki böyükdür, həm də dominantdır. Bəlkə də buna görə “İsrail-Azərbaycan” Assosiasiyasının Heydər Əliyev Fondunun və Azərbaycan Respublikasının Milli Tolerantlıq Mərkəzinin dəstəyi ilə 2014-cü ildə nümayiş etdirməyə başladığı “Azərbaycan tolerantlıq mərkəzidir” fotosərgisi şəhərdə belə maraqla qarşılanıb.
“Azİz” Assosiasiyasından AZƏRTAC-a bildiriblər ki, noyabrın 25-də “Eşkol pays” salonunda keçirilən sərginin açılış mərasimində Or Akiva meri Yakov Edri başda olmaqla, şəhər şurasının demək olar bütün heyəti və Knessetin deputatı Leonid Litinetski iştirak ediblər.
“Azİz” Assosiasiyası nəzdində Azərbaycan Mədəniyyət Mərkəzinin direktoru Yeganə Salman gecənin təntənəli hissəsini açaraq, yəhudi icmasının əsrlər boyu Azərbaycanın həyatında oynadığı tarixi rol barədə kiçik məruzə oxuyub. Salonda oturanların çoxu ivrit dilli olduğu üçün məruzə şəhər icmasının fəalı Oleq Moiseyev tərəfindən dərhal ivrit dilinə tərcümə olunub.
Sonra “Azərbaycan İsrail jurnalistlərinin gözü ilə” sənədli filmi nümayiş etdirilib. Filmdə müasir Azərbaycanın və yəhudi icmasının həyatı çox incə şəkildə, bərbəzəksiz, amma böyük məhəbbətlə təqdim olunub.
Knessetin deputatı Leonid Litinetski təbrik sözündə heç Bakıda olmadığını təəssüf hissi ilə qeyd edərək deyib: “Məndə elə təəssürat yaranıb ki, bu respublikanı yaxşı tanıyıram, çünki əslən Azərbaycandan olanlar arasında çoxlu tanışlarım və dostlarım var. Onlarla ümumi dünyagörüşümüz var. Axı, mən də müsəlmanların yaşadığı Tatarıstan Respublikasında anadan olub, boya-başa çatmışam. Odur ki, onların öz ölkəsinə məhəbbətini yaxşı başa düşürəm, çünki əminəm ki, yəhudilər ilə müsəlmanlar dostluq və mehriban qonşuluq şəraitində yaşaya bilərlər və yaşamalıdırlar.
Qeyd etmək istəyirəm ki, Azərbaycan İsrailə özünün ən yaxşı oğullarını bəxş edib. Əslən bu ölkədən olanların çoxu öz tarixi vətənində yüksək siyasi, ictimai və peşəsi üzrə vəzifələr tutur, İsrail iqtisadiyyatı, elmi, mədəniyyəti və jurnalistikasına əhəmiyyətli töhfə verirlər.
Or Akivanın meri Yakov Edri Qafqazdan gəlmələrin şəhərin həyatındakı rolundan söz açaraq vurğulayıb ki, şəhərdə əslən Azərbaycandan və digər Qafqaz respublikalarından olanların həyatının maraqlı və dolğun olması üçün mümkün olan hər şeyi edir və bundan sonra da edəcək.
Or Akivada fotosərginin təşəbbüskarı, şəhər şurasının deputatı Yosi Peysarov “Azİz” Assosiasiyasına təşəkkür edərək, assosiasiyanın şəhər rəhbərliyi ilə gələcək əməkdaşlıq planlarından söz açıb.
Təntənəli hissənin sonunda şairə Batsion Abramova Azərbaycan dilində gözəl şeirlər oxuyub.
Sonra gecənin konsert hissəsi başlayıb. Qonaqlar tanış və sevimli Azərbaycan melodiyalarından, Panina Yaskovanın rəhbərliyi ilə “Rəqs edən İnci” ansamblının ifasında oynaq rəqslərdən, Eduard İldatov, Liora Safanova, Xava Dolev və gənc müğənni Eyalə Yuşvayevanın ifasında Azərbaycan, dağ yəhudi və ivrit dillərində mahnılardan zövq alıblar.
Ənənəyə görə, tamaşaçılara “Azərbaycan tolerantlıq ərazisidir” sərgisinin rəngarəng bukleti, “İsraildə Azərbaycan günləri “DVD-si hədiyyə olunub. Onlar “Natali” fabrikinin şirniyyatının dadına baxıblar. 15 il əvvəl Azərbaycandan gəlmələr tərəfindən açılan bu şirniyyat fabriki ölkənin əsas şirniyyat istehsalçılarından birinə çevrilib.
Or Akivada fotosərgi gələn ayın ortalarına qədər davam edəcək. Sərginin bağlanışı dekabrın 15-də Mədəniyyət Sarayında olacaq.