İQTİSADİYYAT
Türkiyə nümayəndə heyətinin Azərbaycana səfəri başa çatıb
Bakı, 5 oktyabr, AZƏRTAC
Türkiyə gömrük xidməti nümayəndə heyətinin Azərbaycana səfəri başa çatıb.
Səfərin son günü Türkiyə gömrük xidmətinin nümayəndə heyəti Azərbaycan Respublikası Dövlət Gömrük Komitəsində gömrük xidmətinin müasirləşdirilməsi layihələri ilə, həmçinin Mərkəzi Gömrük Hospitalı, Gömrük Akademiyası, Dünya Gömrük Təşkilatının Bakı şəhərindəki Regional Tədris Mərkəzi və Dövlət Gömrük Komitəsinin “Azərterminalkompleks” Birliyi ilə tanış olub.
Dövlət Gömrük Komitəsində “Hədəf” Mərkəzi ilə tanışlıq zamanı bildirilib ki, BMT İnkişaf Proqramının Azərbaycan Gömrük Xidmətinin təkmilləşdirilməsi layihəsi üzrə yaradılan “Hədəf” Mərkəzinin məqsədi ölkənin gömrük-buraxılış məntəqələrində, eləcə də daxili gömrük orqanlarında, hava limanında və dəmir yolunda həyata keçirilən gömrük prosedurlarını vahid mərkəzdən müşahidə etməkdir. Bu görüntülər yerlərdə quraşdırılan 1000-dək kamera vasitəsilə birbaşa “Hədəf” Mərkəzinə ötürülür və buradakı 20 monitorla izlənilir.
Bundan başqa, gömrük rəsmiləşdirilməsi zamanı yerli gömrük orqanlarında fiziki və hüquqi şəxslərə dair qeydə alınan məlumatlar, o cümlədən, nəqliyyat vasitələrinin texniki göstəriciləri də “on-layn” şəklində “Hədəf” Mərkəzinə daxil olur. Bütün bunlar, ölkənin gömrük ərazisindəki giriş və çıxış məntəqələrində sərnişin və yükdaşımalarına gömrük nəzarətini artırmağa, həm də bu nəzarəti daha çevik və mütəşəkkil qaydada həyata keçirməyə imkan yaradır.
O da diqqətə çatdırılıb ki, “Hədəf” Mərkəzinə daxil olan videogörüntülərlə yanaşı, yük-nəqliyyat vasitələrinin nəzərdə tutulan ünvana hərəkət istiqamətlərini də elektron tabloda izləmək mümkündür. “Hədəf” Mərkəzində hava yolu ilə hərəkət edən sərnişinlərin kimliyi, həmçinin gün ərzində rəsmiləşdirilən yük-gömrük bəyannamələrinin sayı barədə bilgilər əldə etmək olar.
Dövlət Gömrük Komitəsinin Mərkəzi Hospitalında isə qonaqlara bu səhiyyə ocağının üstün imkanları barədə ətraflı məlumat verilib, ən müasir tibbi ləvazimatlarla təchiz olunan hospitalda xəstələrin müayinə və müalicəsi üçün hər cür şəraitin yaradıldığı nəzərə çatdırılıb.
Sonra DGK-nın Akademiyasında olan qonaqlara məlumat verilib ki, bu ali təhsil ocağı 2012-ci ilin yanvarında təsis edilib, ilk tələbə qəbulu isə 2014-cü ildə həyata keçirilib. Gömrük Akademiyası gömrük sistemini yüksək səviyyəli peşəkar kadrlarla təmin etmək məqsədilə yaradılıb. Burada tələbə və müəllimlər üçün lazımi şərait təmin edilib.
Dünya Gömrük Təşkilatının Bakı şəhərindəki Regional Tədris Mərkəzinə baş çəkən nümayəndə heyətinə bildirilib ki, 2003-cü ilin sentyabrında fəaliyyətə başlayan Regional Tədris Mərkəzində indiyədək bir sıra beynəlxalq və regional tədris kursları keçirilib, seminarlar, treninqlər təşkil olunub. Burada müxtəlif ölkələrdən və Azərbaycanın bölgələrindən gələn müdavimlərin rahatlığının təmin edilməsi üçün otel tipli yataqxana, idman zalı, iaşə obyektləri, tibb otağı da fəaliyyət göstərir.
DGK-nın “Azərterminalkompleks” Birliyinin inzibati binasında isə nümayəndə heyəti Azərbaycanın ümummilli lideri Heydər Əliyevin xatirə muzeyi və Gömrük Tarixi Muzeyi ilə tanış olub.
Bununla da Türkiyə Respublikasının gömrük və ticarət naziri Cenap Aşçının rəhbərlik etdiyi nümayəndə heyətinin Azərbaycana səfəri başa çatıb.
Xatırladaq ki, Azərbaycan və Türkiyə prezidentlərinin iştirakı ilə Ankarada Türkiyə-Azərbaycan Yüksək Səviyyəli Strateji Əməkdaşlıq Şurasının iclasında iki ölkənin gömrük xidmətləri arasında birgə komitənin yaradılması ilə bağlı qəbul edilən qərara uyğun olaraq oktyabrın 2-də Bakıda komitənin ilk toplantısı keçirilib.
Azərbaycan Respublikası Dövlət Gömrük Komitəsinin sədri, gömrük xidməti general-leytenantı Aydın Əliyev və Türkiyə Respublikasının gömrük və ticarət naziri Cenap Aşçının iştirakı ilə keçirilən toplantıda iki ölkə arasında gömrük və ticarət əlaqələrinin daha da inkişaf etdirilməsi məsələləri müzakirə olunub. Bu əlaqələrin hazırkı vəziyyəti, gömrük rəsmiləşdirilməsi, əməliyyatların sadələşdirilməsi kimi məsələlər nəzərdən keçirilib.
Yekunda Azərbaycan Respublikasının Dövlət Gömrük Komitəsi ilə Türkiyə Respublikasının Gömrük və Ticarət Nazirliyi arasında Gömrük Məsələləri üzrə Birgə Komitənin birinci iclasının protokolu imzalanıb.
Sənədi Azərbaycan Respublikası Dövlət Gömrük Komitəsinin sədri Aydın Əliyev və Türkiyə Respublikasının gömrük və ticarət naziri Cenap Aşçı imzalayıblar.