İDMAN
"Rio-2016" Yay Olimpiya Oyunlarının on beşinci günündə daha 30 dəst medal sahibini tapacaq
Bakı, 20 avqust, AZƏRTAC
Rio-de-Janeyroda təşkil olunan XXXI Yay Olimpiya Oyunlarının on beşinci günündə - avqustun 20-də idmançılar 30 dəst medal uğrunda yarışacaqlar.
AZƏRTAC xəbər verir ki, kişilər arasında 17, qadınların mübarizəsində isə 13 dəst medal sahibini tapacaq.
Kişilərin mübarizəsində badminton (şəxsi), avarçəkmə (bir nəfərlik qayıqla 200, ikinəfərlik qayıqla 100, dördnəfərlik qayıqla 500 metr məsafəyə yürüş), boks (56, 75 kq), suya tullanma (10 metr hündürlükdən tullanma), futbol, sərbəst güləş (86, 125 kq), su polosu, müasir beşnövçülük, atletika (1500 və 5000 metr məsafəyə qaçış, 400 metr məsafəyə estafet, nizəatma) və taekvondo (80 kq-dan yuxarı) yarışlarında qaliblər müəyyənləşəcək.
Qadınlar arasında isə qolf, avarçəkmə (dördnəfərlik qayıqla 500 metr məsafəyə yürüş), triatlon, velosiped idmanı (mauntinbayk), boks (51,56 kq), bədii gimnastika (fərdi çoxnövçülük), basketbol, həndbol, atletika (hündürlüyə tullanma, 800 metr məsafəyə qaçış, 400 metr məsafəyə estafet) və voleybol üzrə yarışlarda medallar sahibini tapacaq.
Yarışın on beşinci günündə 4 Azərbaycan idmançısı mübarizə aparacaq. Yarışda sərbəst güləşçilərimiz Şərif Şərifov (86 kq), Cəmaləddin Məhəmmədov (125 kq), taekvondoçumuz Radik İsayev (80 kq-dan yuxarı) və bədii gimnast Marina Durunda ölkəmizi təmsil edəcək.