Azərbaycan Respublikası Prezidentinin “Azərbaycan Respublikasında maliyyə-bank sistemində islahatların dərinləşdirilməsi ilə əlaqədar əlavə tədbirlər haqqında” 2005-ci il 1 mart tarixli 205 nömrəli Fərmanına və “Kapital Bank” Açıq Səhmdar Cəmiyyətinin dövlətsizləşdirilməsi ilə bağlı tədbirlər haqqında” 2007-ci il 9 fevral tarixli 1958 nömrəli Sərəncamına uyğun olaraq “Kapital Bank” Açıq Səhmdar Cəmiyyətinin nizamnamə kapitalının həcmi əlavə səhm emissiyası hesabına iki dəfə artırılmış və yeni buraxılmış səhmlərin satışı həyata keçirilmişdir.

“Kapital Bank” Açıq Səhmdar Cəmiyyətinin özəlləşdirilməsi prosesinin tamamlanmasını, özəlləşdirmədə hüquqi şəxslərlə yanaşı bankın əmək kollektivinin və fiziki şəxslərin iştirakını təmin etmək məqsədi ilə qərara alıram:

1. “Kapital Bank” Açıq Səhmdar Cəmiyyətinin dövlətə məxsus 1.200.000 ədəd səhmlərinin:

1.1. 5 (beş) faizi nominal dəyərlə, bu Sərəncamın imzalanması tarixinə bankın əmək kollektivi üzvlərinə və qanunvericiliklə onlara bərabər tutulan şəxslərə;

1.2. 10 (on) faizi hər səhm zərfi 6.000 ədəd səhmdən ibarət olmaqla hərrac vasitəsilə (müsabiqə formasında) fiziki şəxslərə;

1.3. 85 (səksən beş) faizi isə hər səhm zərfi 60.000 ədəd səhmdən ibarət olmaqla hərrac vasitəsilə (müsabiqə formasında) hüquqi şəxslərə satışa yönəldilsin.

2. Azərbaycan Respublikasının Dövlət Əmlakının İdarə Edilməsi üzrə Dövlət Komitəsinə tapşırılsın:

2.1. “Kapital Bank” Açıq Səhmdar Cəmiyyətinin dövlətsizləşdirilməsi ilə bağlı tədbirlər haqqında” Azərbaycan Respublikası Prezidentinin 2007-ci il 9 fevral tarixli 1958 nömrəli Sərəncamının 2.1-ci bəndinə uyğun olaraq alıcıların seçilməsini hüquqi şəxslər üçün müəyyən edilmiş meyarlar və şərtlər əsasında, fiziki şəxslər üçün isə “Banklar haqqında” Azərbaycan Respublikası Qanununun tələbləri nəzərə alınmaqla həyata keçirsin;

2.2. hərraclarda bir hüquqi şəxsin 360.000 ədəd səhmdən (altı səhm zərfi) artıq həcmdə səhmlərə sifariş vermək hüququnun olmaması şərti əsas götürülməklə, bu Sərəncamın 2.1-ci bəndinə uyğun olaraq müəyyən edilmiş meyar və şərtlərə uyğun olaraq seçilmiş alıcılara səhmlərin satışını təşkil etsin.

3. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.

4. Bu Sərəncam imzalandığı gündən qüvvəyə minir.

İlham Əliyev

Azərbaycan Respublikasının Prezidenti

Bakı şəhəri, 19 oktyabr 2007-ci il.