-Çox hörmətli İlham Heydər oğlu!

Çox hörmətli Viktor Antonoviç!

Bu gün əlamətdar hadisə münasibətilə buraya toplaşmışıq. Bu, mənim üçün ikiqat əlamətdardır, çünki mənim məktəb illərim Bakıda keçmişdir. Mən orada 153 nömrəli orta məktəbi bitirmiş və Moskva Universitetinə daxil olmuşam. İndiyədək bu gözəl şəhəri, onun insanlarını böyük səmimiyyətlə xatırlayıram. Mən müəllimlərimi minnətdarlıq hissi ilə xatırlayır, Azərbaycanda və Bakıda baş verən hadisələri izləməyə çalışıram. Düşünürəm ki, Azərbaycan çox şeylə fəxr edə bilər. Hazırda o, ən dinamik inkişaf edən ölkədir. Siz MDB ölkələri arasında ən sürətli inkişaf nümayiş etdirirsiniz. Özü də beynəlxalq təşkilatlar gələcəkdə bu meylin təkcə dünyada neftin və qazın qiymətlərinin artması hesabına deyil, həm də sənaye, xidmət sahələri hesabına saxlanacağını proqnozlaşdırır. Əlbəttə, bu, ölkədə bir çox irimiqyaslı məsələləri həll etməyə, o cümlədən təhsili, səhiyyəni, mənzil tikintisini inkişaf etdirməyə imkan verir.

Mənə elə gəlir ki, son illər Bakı dünyanın idman mərkəzinə çevrilir. Çox böyük beynəlxalq yarışlar, dünya birincilikləri, dünya kuboku yarışları keçirilir. Bu, Azərbaycanın artan nüfuzundan xəbər verir və ölkədə siyasi sabitliyin olduğunu göstərir. Başqa sözlə, idman vasitəsilə beynəlxalq aləmə çox böyük çıxışa nail olunur. Əlbəttə, bu, Milli Olimpiya Komitəsinin prezidenti kimi Sizin xidmətinizdir və artıq deyildiyi kimi, Olimpiya hərəkatına töhfəniz yüksək qiymətləndirilir. Bu töhfəniz 2016-cı ilin Olimpiya oyunlarının keçirilməsi ilə bağlı Bakının namizədliyinin irəli sürülməsi kimi cəsarətli təklifinizdən sonra xüsusilə yüksək qiymətləndirilir. Bu, çox iddialı təklifdir, çünki dünyada belə genişmiqyaslı beynəlxalq tədbirləri keçirmək məsuliyyətini üzərinə götürə bilən çox az ölkə var. Siz bu cəsarətli addımı atdınız. Əlbəttə, Bakının rəqibləri güclüdür, ancaq biz inanırıq ki, Odlar yurdu adlandırılan Azərbaycanda Olimpiya məşəli də alovlanacaqdır.

Mənə Moskva Universitetinin nümayəndə heyətinin tərkibində Bakı Universitetinin yubileyi ilə bağlı təntənələrdə iştirak etmək xoşbəxtliyi nəsib olmuşdur. Biz şəhərin necə gözəlləşdiyini, şəhər infrastrukturunun necə inkişaf etdiyini, necə gözəl binaların tikildiyini öz gözlərimizlə gördük. Biz təhsilin inkişafına ən yüksək dövlət səviyyəsində necə böyük diqqət yetirildiyini gördük. Heydər Əlirza oğlu özü Bakı Universitetinin, Rusiya və Azərbaycan universitetləri arasında əməkdaşlığın necə inkişaf etdiyini diqqətlə izləyirdi. Bu yolun davamçısı kimi, Siz MDU-nun filialının yaradılmasının təşəbbüskarı oldunuz. Şübhəsiz ki, bu, əməli nəticə verəcək, çünki Rusiya Federasiyası ilə Azərbaycan arasında dərin iqtisadi, mədəni əlaqələr var və bu əlaqələri yeni səviyyəyə qaldıracaq mütəxəssislər lazımdır. Digər tərəfdən, əlbəttə, bu, siyasi səviyyədə dostluğun təzahürüdür.

Biz Bakı Universitetindən olan həmkarlarımızla şəxsi ünsiyyətdə, ictimai təşkilatlarımız səviyyəsində bu dostluq hisslərinin şahidi oluruq. Bakı Universitetinin həmkarlar ittifaqı təşkilatı Universitetlərin Həmkarlar İttifaqları Təşkilatlarının Avrasiya Assosiasiyasının fəaliyyətinə çox böyük töhfə verir. Bu assosiasiyaya MDB-nin, demək olar, bütün klassik universitetləri daxildir. Biz qurultaylardan birinin Bakıda, Bakı Universitetində keçirmək barədə qeyri-rəsmi təklif almışıq və bu təklifi minnətdarlıqla qəbul etmişik. Mənə elə gəlir ki, bu dostluq və sədaqət hissi Azərbaycan xalqının qanındadır. Təsadüfi deyil ki, hələ XII əsrdə dahi Azərbaycan şairi Nizami Gəncəvi də bu barədə yazmışdır.

Əminəm ki, Moskva Universiteti, onun filialının fəaliyyətində iştirak edəcək professor-müəllim heyəti Nizaminin nəsihətlərinə əməl edərək, öz işinə çox məsuliyyətlə yanaşacaqdır. Sonda Sizi Moskva Universitetinin bu ən yüksək mükafatını almağınız münasibətilə təbrik etmək, Sizə, ailənizə xoşbəxtlik, cansağlığı və Azərbaycanın rifahı naminə fəaliyyətinizdə uğurlar arzulamaq istərdim.

Çox sağ olun.

X X X

Sonra söz MDU-nun hesablama riyaziyyatı və kibernetika fakültəsinin üçüncü kurs tələbəsi Ülfət Əliyevə verildi.