SİYASƏT
Pakistan ictimaiyyəti Azərbaycan həqiqətləri barədə məlumatlandırılıb
İslamabad, 15 fevral, АZƏRTAC
Pakistanın “Global Affairs” jurnalının fevral buraxılışında Azərbaycanın bu ölkədəki səfiri Əli Əlizadənin müsahibəsi dərc olunub.
İkitərəfli əlaqələrə toxunan səfir Azərbaycan ilə Pakistanın qardaş müsəlman ölkəsi olduğunu vurğulayıb. O, ölkələrimizin ortaq tarixi, dini, mədəni və siyasi dəyərlərə malik olduğunu qeyd edib. Azərbaycan öz müstəqilliyini bərpa etdikdən sonra iki qardaş dövlət arasında münasibətlər inkişaf mərhələsinə qədəm qoyub və indiki yüksək səviyyəyə çatıb.
Ölkələrimiz beynəlxalq təşkilatlarda, həmçinin Kəşmir və Dağlıq Qarabağ məsələlərində BMT Təhlükəsizlik Şurasının müvafiq qətnamələrini dəstəkləyir. Hər iki ölkənin rəhbərləri əlaqələrə böyük əhəmiyyət verir və hazırda iqtisadi əməkdaşlığımızın da yüksək səviyyəyə çatdırılması istiqamətində səy göstərirlər.
Kənd təsərrüfatı, enerji, idxal-ixrac, xarici investisiyanın ölkəyə cəlb olunması ilə bağlı sualları cavablandıran səfir Azərbaycanın 20 ildən çoxdur ki, bütün sahələrdə, o cümlədən sosial-iqtisadi sahədə dinamik şəkildə inkişaf edən bir ölkə olduğunu bildirib. Neftin qiymətinin kəskin şəkildə düşməsinə baxmayaraq, ölkədə iqtisadi artım davam etməkdədir.
Səfir bildirib ki, neftdən asılılığı azaldan Azərbaycan iqtisadiyyatı üçün kənd təsərrüfatı sahəsi xüsusi əhəmiyyətə malikdir və 2016-cı ildə ölkəmizin meyvə-tərəvəz ixracatı ötən ildəkinə nisbətən 25 faiz artıb. Bir neçə ay bundan əvvəl elektron ticarət portalı olan azexport.az–ın Azərbaycanda təqdimatının keçirildiyini bildirən səfir məqsədin yerli məhsullar barədə məlumatın əldə edilməsini asanlaşdırmaq və həmin məhsulların əsasən xarici bazarlarda satışını təmin etmək olduğunu bildirib. Pakistanlı iş adamları da həmin portaldan yararlanaraq məlumat əldə edə və kənd təsərrüfatı sahəsində əməkdaşlığı genişləndirə bilərlər.
Qeyd olunur ki, Azərbaycan Pakistan şirkətlərinin fəaliyyəti üçün lazımi şəraitin yaradılmasına hazırdır. 2016-cı ildə Azərbaycan ilə Pakistan arasındakı ticarət dövriyyəsi ötən ildəkinə nisbətən üç dəfə artıb. Fevral ayında Azərbaycandan Pakistana səfər edən ticarət missiyasının məqsədi də ölkələrimiz arasında ticarət dövriyyəsini genişləndirməkdir. Bundan başqa, yaxın vaxtlarda iki ölkə arasında enerji sahəsində əməkdaşlığa dair hökumətlərarası razılaşmanın imzalanması nəzərdə tutulur. Biz, həmçinin pakistanlılar üçün viza rejimini sadələşdirmişik və indi hər kəs Azərbaycana vizanı onlayn əldə edə bilər.
Azərbaycanda xarici investorlar üçün gözəl şəraitin mövcud olduğunu bildirən səfir hökumətin xarici investisiyanı ölkə iqtisadiyyatına cəlb etmək üçün açıq qapı siyasəti həyata keçirdiyini qeyd edib. Bir çox beynəlxalq iqtisadi təşkilatlar müxtəlif statistik cədvəllərdə Azərbaycanı yüksək reytinqli ölkələr sırasına daxil edib. Ölkəmizdə, həmçinin müxtəlif sənaye və texnologiya parkları mövcuddur ki, burada xarici şirkətlər və iş adamları bir çox vergi güzəştlərindən istifadə edirlər.
Ermənistanın Azərbaycana qarşı təcavüzü ilə bağlı sualları da cavablandıran Əli Əlizadə bildirib ki, bu təcavüz nəticəsində on minlərlə insan öldürülüb, soyqırımı törədilib, Azərbaycanın tarixini və mədəniyyətini silmək məqsədilə xeyli sayda dəyərli abidə və sənət əsərləri məhv edilib. Müxtəlif beynəlxalq təşkilatlar, o cümlədən İslam Əməkdaşlıq Təşkilatı (İƏT) Ermənistanı işğal olunmuş ərazilərdəki abidələri məhv etdiyi üçün sərt şəkildə tənqid edib. Qeyd olunan işğal faktı BMT Təhlükəsizlik Şurasının, İƏT-in, Qoşulmama Hərəkatının qətnamələrində, həmçinin Avropa Şurasının rəsmi sənədlərində öz əksini tapıb, beynəlxalq ictimaiyyət tərəfindən təsdiqlənib.
Azərbaycanın hazırda regionda ən güclü orduya malik olduğunu qeyd edən səfir Silahlı Qüvvələrimizin istənilən vaxt düşmən mövqelərini məhv etməyə hazır olduğunu, lakin Azərbaycanın münaqişənin sülh yolu ilə həllini istədiyini və bu istiqamətdə davamlı siyasət yürütdüyünü bildirib. Bildirilir ki, Dağlıq Qarabağ Azərbaycanın tarixi ayrılmaz tərkib hissəsidir və Azərbaycan öz ərazi bütövlüyünü istənilən yolla bərpa edəcəkdir.
Azərbaycanın multikulturalizm ölkəsi kimi tanınması və Pakistanla bu sahədə əlaqələrə dair suala münasibət bildirən səfir qeyd edib ki, 2016-cı il Azərbaycanda “Multikulturalizm İli” olub, ölkəmiz müstəqil dövlət kimi regionda və dünyada multikulturalizm ənənələrinin inkişafına öz töhfəsini verməkdədir. Son illərdə Bakıda çoxlu sayda beynəlxalq tədbirlər, o cümlədən Bakı Beynəlxalq Humanitar Forumu, Mədəniyyətlərarası Dialoq üzrə Dünya Forumu və s. keçirilib. 2016-cı ildə Bakıda, həmçinin BMT Sivilizasiyalar Alyansının VII Qlobal Forumu təşkil edilib və tədbirin məqsədi sülhün möhkəmlənməsi, müxtəlif mədəni və dini dəyərlərə malik olan insanların bir-birinə qarşılıqlı hörmət göstərməsini nümayiş etdirmək olub. Bu forumlarda Pakistan nümayəndələrinin də iştirak etdiyi vurğulanıb.
Səfir multikulturalizm sahəsindəki fəaliyyətdən bəhs edərkən Heydər Əliyev Fondunun layihələrini xüsusi qeyd edib. Bildirib ki, Heydər Əliyev Fondunun Azərbaycanın birinci xanımı Mehriban Əliyevanın təşəbbüsü və dəstəyi ilə müxtəlif ölkələrdə, o cümlədən Pakistanda həyata keçirdiyi sosial, humanitar və səhiyyə layihələri ölkəmizin mədəni müxtəliflik və universal dəyərlərə sadiqliyini nümayiş etdirməklə yanaşı, mədəniyyətlərarası dialoqa və xalqlar arasındakı yaxınlaşmaya töhfə verir.
Azərbaycan Prezidentinin müvafiq Sərəncamı ilə 2017-ci ilin ölkədə “İslam Həmrəyliyi İli” elan edildiyini diqqətə çatdıran səfir, Sərəncamın əsas məqsədinin İslam həmrəyliyində Azərbaycanın özünəməxsus rolunu gücləndirmək olduğunu bildirib. Səfir Azərbaycanın bu il də tolerantlığın və dialoqun inkişafına və dünyada İslami dəyərlərin təbliğinə töhfə verəcəyinə əminliyini ifadə edib.
Qulu Kəngərli
AZƏRTAC-ın xüsusi müxbiri
İslamabad