Prezident Rəcəb Tayyib Ərdoğan: Rusiya və Türkiyə rəhbərliyi bu təxribata uymayacaq qədər iradəyə malikdir VİDEO
Bakı, 20 dekabr, АZƏRTAC
Türkiyə Prezidenti Rəcəb Tayyib Ərdoğan Rusiyanın Türkiyədəki səfiri Andrey Karlovun qətlə yetirilməsi ilə bağlı açıqlama verib.
AZƏRTAC-a Türkiyənin Azərbaycandakı səfirliyindən daxil olmuş açıqlamada Prezident Ərdoğan hücumu nifrətlə qınadığını bildirir. Açıqlamada daha sonra deyilir: “Bilirik ki, bu, xüsusilə Türkiyə-Rusiya münasibətlərinin normallaşması prosesini pozmağa yönəlmiş təxribatdır. Amma həm Rusiya, həm də Türkiyə rəhbərliyi bu təxribata uymayacaq qədər iradəyə malikdir.
Vladimir Putin ilə axşamkı telefon danışığımızda beynəlxalq terrorçuluqla mübarizədə bundan sonra daha güclü və daha fərqli həmrəylik nümayiş etdirəcəyimiz barədə razılığa gəldik. Türkiyə dövləti və xalqı adından Rusiya Prezidenti Vladimir Putinin şəxsində dost Rusiya xalqına bir daha başsağlığı verirəm.
Bu vəziyyətdən öz mənafeləri üçün istifadə etmək istəyənlərin kim olduğunu bilirik və onları yaxından izləyirik. Rusiyalı səfirə edilən hücum Türkiyənin və Rusiyanın Suriya ilə bağlı yaxşı əməkdaşlığına yönəlmiş bir təxribatdır.
Türkiyə və Rusiya, başımız sağ olsun!”
Bölmənin digər xəbərləri
