Liviya təyyarəsini qaçıran şəxslər sərnişinləri buraxıblar VİDEO
Bakı, 23 dekabr, AZƏRTAC
Sky News Arabia telekanalı Liviyanın qaçırılmış təyyarəsindəki sərnişinlərin sərbəst buraxıldığı barədə məlumat yayıb.
AZƏRTAC xarici KİV-lərə istinadla xəbər verir ki, göyərtəsində 118 nəfərin olduğu təyyarə Maltada yerə enib. Maltanın Baş naziri Cozef Muskat bildirib ki, təyyarəni qaçıran şəxslərlə danışıqlar aparılır və təhlükəsizlik tədbirləri görülür. Yerli KİV-lər xəbər verir ki, təyyarəni qaçıranlar onu partlatmaqla hədələyiblər. Onların hansı tələblər irəli sürdükləri məlum deyil.
TVM kanalının aeroportdan yaydığı kadrlarda uçuş-enmə zolağına azı üç avtomobilin yaxınlaşdığı görünür. Həmin avtomobillərdən onlarla hərbi formalı şəxs çıxaraq təyyarədən bir neçə yüz metr aralıda dayanaraq tapşırıq gözləyir. Hələlik hər hansı fəaliyyət nəzərə çarpmır.
Xatırladaq ki, Liviyanın Afriqiyah Airways aviaşirkətinə məxsus Airbus A320 təyyarəsi Liviyanın Sabxa şəhərindən Tripoliyə uçurdu. İlkin məlumata görə, təyyarənin göyərtəsində 111 sərnişin və 7 ekipaj üzvü olub.
Bölmənin digər xəbərləri
