Pirallahıda məktəblərin maddi-texniki bazasının möhkəmləndirilməsi istiqamətində işlər davam etdiriləcək

Bakı, 15 sentyabr, AZƏRTAC

Sentyabrın 15-də Pirallahı rayonunun bütün orta ümumtəhsil məktəblərində ənənəvi olaraq Bilik günü münasibətilə tədbirlər keçirilib. Bu barədə AZƏRTAC-a Pirallahı Rayon İcra Hakimiyyətindən məlumat verilib.

Rayon ərazisində yerləşən altı məktəbin hər birində təşkil edilmiş tədbirlərdə məktəb direktorları hər keçən gün daha da güclənən, inkişaf edən təhsilimizə göstərilən yüksək diqqət və qayğıya görə Prezident İlham Əliyevə dərin minnətdarlıqlarını bildiriblər. Onlar yaradılmış geniş imkanlardan yüksək səviyyədə bəhrələnərək ölkəmizin gələcək inkişafı üçün təhsilli, savadlı gənclər yetişdirəcəklərinə dair söz veriblər.

Tədbirlərə qatılmış Pirallahı Rayon İcra Hakimiyyəti Aparatının məsul əməkdaşları məktəblərin pedaqoji kollektivlərini və şagirdləri Bilik günü münasibətilə təbrik edib və onlara təhsildə uğurlar arzulayıblar. Qeyd edilib ki, yeni tədris ilində də məktəblərin maddi-texniki bazasının möhkəmləndirilməsi istiqamətində işlər davam etdiriləcək.

Vurğulanıb ki, sentyabrın 14-də Pirallahı Rayon İcra Hakimiyyəti tərəfindən təşkil olunmuş rayon müəllimlərinin toplantısında təhsildəki nailiyyətlər, mövcud problemlər, qarşıda duran vəzifələr ətraflı müzakirə edilib. Ölkəmizin hər yerində olduğu kimi, Pirallahı rayonunda da geniş quruculuq və abadlıq işləri aparılır, eyni zamanda, təhsil sahəsinin inkişafına xüsusi diqqət və qayğı göstərilir, rayonun bütün ümumtəhsil məktəblərinin müasir inventar və avadanlıqlarla təmin olunması istiqamətində zəruri işlər görülür.

Tədbirlərdə çıxış edən şagirdlər dövlətimiz tərəfindən təhsilə göstərilən diqqət və qayğıya görə dövlətimizin başçısına minnətdarlıqlarını bildirib, öz sevinclərini oxuduqları mahnılar, söylədikləri şeirlərlə ifadə ediblər.

Qeyd edək ki, 2017-2018-ci tədris ilində rayonda 318 uşaq ilk dəfə məktəbin qapısını açıb. Onlardan 261-i Azərbaycan, 57-si isə rus bölmələrində təhsil alacaq. Ötən tədris ilində Pirallahı rayon məktəblərini 181 məzun bitirib. Onlardan 102-si ali məktəblərə qəbul üçün sənəd verib və 82-si qəbul olunub. Sənəd verənlərin sayına nisbətən qəbul 80 faiz təşkil edib. Keçən illə müqayisədə qəbul olunanların sayı 11 nəfər çoxdur. Eyni zamanda, bu il yüksək bal toplayanların sayı da keçən illə müqayisədə çoxluq təşkil edir. Belə ki, abituriyentlərdən üçü 600-dən yuxarı bal toplayıb.