Bakı, 26 oktyabr, AZƏRTAC

Oktyabrın 20-dən noyabrın 20-dək “Uşaq hüquqları aylığı” elan edilib. Paytaxtın Sabunçu qəsəbəsindəki 12 nömrəli şəhər poliklinikasında aylıq çərçivəsində uşaqların sağlam yaşamaq hüququnun təmin edilməsi məqsədi ilə maarifləndirici tədbir keçirilib.

Sabunçu Rayon İcra Hakimiyyətindən AZƏRTAC-a verilən məlumata görə, tədbirdə çıxış edən rayon icra hakimiyyəti başçısının müavini Rəna Fərəcova və Azərbaycan Respublikasının İnsan Hüquqları üzrə müvəkkilinin (Ombudsman) nümayəndəsi Nigar Ağayeva uşaq hüquqlarının qorunması sahəsində dövlətin göstərdiyi qayğıdan ətraflı söhbət açıblar.

Rayon Gigiyena və Epidemiologiya Mərkəzinin şöbə müdiri Kamal Vəkilov şagirdlərə sağlamlığın qorunması ilə əlaqədar müxtəlif əyani vəsaitlər paylayaraq sanitar-gigiyenik qaydalar barədə danışıb. “Sağlam Ailə” tibb mərkəzinin pediatrı Etibar Süleymanov xüsusi hazırlanmış videoçarx vasitəsilə şagirdlərə ilkin tibbi yardım haqqında praktik biliklər, poliklinikanın şöbə müdiri Emin Məmmədov isə son günlərdə geniş yayılan uşaq xəstəlikləri və onların qarşısının alınması yolları haqqında məlumat verdi.

Sonra qonaqlar şagird və müəllimləri maraqlandıran sualları cavablandırıblar.