Hüquq olimpiadası Sabunçu rayonundakı 46 məktəbi əhatə edir
Bakı, 1 noyabr, AZƏRTAC
Bakı Şəhəri üzrə Təhsil İdarəsinin (BŞTİ) tabeliyində fəaliyyət göstərən təhsil müəssisələrinin şagirdləri arasında 12 noyabr - Konstitusiya Gününə həsr olunmuş “Hüquqi dövlətin əsasları” adlı olimpiada keçirilir.
BŞTİ-dən AZƏRTAC-a bildirilib ki, hər il paytaxtın bir rayonu üzrə məktəbləri əhatə edən bilik yarışı bu dəfə Bakının Sabunçu rayonunda təşkil olunub.
Konstitusiya Məhkəməsinin təşkilatçılığı, Təhsil Nazirliyi və Sabunçu Rayon İcra Hakimiyyətinin dəstəyi ilə keçirilən olimpiadanın əsas məqsədi gənclər arasında hüquqi mədəniyyətin və biliklərin inkişaf etdirilməsindən, Azərbaycan Respublikası Konstitusiyasının əsasları və mahiyyətinin daha dərindən öyrənilməsindən ibarətdir.
Hüquq olimpiadası Sabunçu rayonundakı ümumtəhsil müəssisələrinin şagirdləri arasında noyabrın 6-dək təşkil ediləcək. Olimpiadada rayonda yerləşən 46 məktəbin hər birindən 20 şagird iştirak edir. Şagirdlərə Azərbaycan Respublikası Konstitusiyasını əhatə edən 50 sual təqdim olunur.
Olimpiadanın sonunda qaliblərə Konstitusiya Məhkəməsinin təsis etdiyi kubok, diplom və xatirə hədiyyələri təqdim olunacaq.
Bölmənin digər xəbərləri
