“Ağ ölüm”ə qarşı birgə səylərlə mübarizə aparılmalıdır
Bakı, 21 dekabr, AZƏRTAC
Sabunçu rayonunun Bilgəh qəsəbəsindəki 11 nömrəli inteqrasiya təlimli internat məktəbində “Ağ ölüm bəşəriyyətin faciəsidir” mövzusunda növbəti maarifləndirici tədbir keçirilib. Tədbir icra hakimiyyəti və rayon Polis İdarəsinin birgə təşkilatçılığı ilə təşkil edilib.
Rayon icra hakimiyyətindən AZƏRTAC-a verilən məlumata görə, giriş sözü ilə çıxış edən məktəbin direktoru Gülnarə Abdullayeva tədbirin məqsəd və əhəmiyyəti barədə danışıb.
Narkotik vasitələrdən istifadə və onun yaratdığı fəsadlardan bəhs edən videoçarx nümayiş olunub.
Sabunçu Rayon İcra Hakimiyyətində şöbə müdirinin müavini Ədalət Teymurov müasir dövrün ən arzuolunmaz bəlalarından olan narkomaniya və onun fəsadları, gətirdiyi faciələr barədə məlumat verib.
Rayon Polis İdarəsinin rəisi Eldar İlyasov, Bakı Şəhər Narkoloji Dispanserin həkim-narkoloqu Pərvin Abbasova, rayon Gənclər və İdman İdarəsinin rəisi Rakif Əliyev çıxış edərək respublikada narkomanlığın yayılması ilə mübarizənin gücləndirilməsi, onun qarşısının alınması üçün antinarkotik təbliğatın, maarifləndirici tədbirlərin əhəmiyyəti, narkotiklərin qanunsuz dövriyyəsinin və narkomanlığın yayılmasının qarşısının alınması barədə danışıblar.
Sonra qonaqlar mövzu ilə əlaqədar şagirdləri maraqlandıran suallara cavablar veriblər.
Bölmənin digər xəbərləri
