Bakı, 26 fevral, AZƏRTAC

Fevralın 26-da Bakı Slavyan Universitetində (BSU) Xocalı faciəsinin 26-cı ildönümünə həsr olunan tədbir keçirilib.

BSU-dan AZƏRTAC-a bildirilib ki, tədbirdə bu universitetin rektoru, professor Nurlana Əliyeva Ermənistanın Azərbaycana qarşı işğalçılıq siyasətinin tərkib hissəsi olan Xocalı soyqırımından 26 il ötdüyünü qeyd edib. Diqqətə çatdırılıb ki, beynəlxalq hüququn norma və prinsiplərinin, insan hüquq və azadlıqlarının kütləvi şəkildə, kobudcasına pozulması ilə nəticələnən, bəşər tarixinə böyük qanlı faciə kimi daxil olan bu terror aktı xalqımızın qan yaddaşında silinməz izlər qoyub. Azərbaycanın 20 faiz torpaqlarının işğal olunduğunu, insanların öldürüldüyünü, tarixi abidələrin məhv edildiyini dünya ictimaiyyətinə çatdırmaq hər bir Azərbaycan vətəndaşının borcudur. Vətənpərvər ruhda böyüyən müasir Azərbaycan gənclərinin hər an döyüşə hazır olduqlarını deyən rektor vurğulayıb ki, 2016-cı ilin Aprel döyüşlərində ordumuzun göstərdiyi şücaət bunun bariz nümunəsidir.

N.Əliyeva ölkə daxilində, eləcə də respublikamızdan kənarda Xocalı soyqırımını dünya ictimaiyyətinə çatdırmaq istiqamətində görülən işlərdən, təşkil edilən aksiya və tədbirlərdən danışıb, həmvətənlərimizin ümummilli lider Heydər Əliyevin azərbaycançılıq ideologiyasını rəhbər tutaraq dövlət siyasətinə dəstək olduqlarını bildirib. Yaxın zamanda torpaqlarımızın düşmən tapdağından azad ediləcəyini əminliklə vurğulayan rektor gəncləri düşməndən qisas almaq üçün hər an hazır olmağa səsləyib.

BSU-nun beynəlxalq münasibətlər kafedrasının müdiri, professor Habil Məmmədov qeyd edib ki, tarixboyu xalqımıza qarşı qəsbkar siyasət yeridən ermənilərin Xocalıda törətdikləri kütləvi insan qırğını, ağlasığmaz qəddarlıq və işgəncələr birmənalı genosid faktıdır və erməni vəhşiliyinin sübutudur. Xocalı həqiqətlərinin dünyaya çatdırılması, eləcə də bu soyqırımına obyektiv qiymətin verilməsi istiqamətində dövlətimiz tərəfindən davamlı addımlar atılır. Hazırda bu proses Azərbaycanın xarici siyasətinin əsas istiqamətlərindən biridir.

BSU-nun azərbaycanşünaslıq elmi-tədqiqat laboratoriyasının müdiri, dosent Sadir Məmmədov diqqətə çatdırıb ki, Xocalı soyqırımı azərbaycanlılara qarşı erməni şovinist dairələrinin XIX-XX əsrlərdə mərhələ-mərhələ həyata keçirdiyi etnik təmizləmə siyasətinin tərkib hissəsidir. Xocalı həqiqətləri dünya ictimaiyyətinə, xarici ölkələrin parlamentlərinə çatdırılmalı, Azərbaycan xalqının və ümumən insanlığın əleyhinə yönəldilmiş bu son dərəcə ağır hərbi cinayət beynəlxalq miqyasda öz hüquqi-siyasi qiymətini almalıdır.

Xocalı Şəhər Polis Bölməsinin rəis müavini, polis polkovnik-leytenantı Hafiz Ədilov fevralın 25-dən 26-na keçən gecə dinc, əliyalın əhaliyə qarşı törədilmiş qətliamı bir daha ürəkağrısı ilə xatırladıb, Azərbaycanın bu qanlı hadisəni unutmadığını, xalqımızın qəlbində erməni vandalizminə qarşı nifrətin getdikcə daha da artdığını söyləyib.

Sonra BSU-nun magistrantları Könül Əlizadənin “Soyqırımının dünyada tanıdılması istiqamətində görülən işlər”, Natiq Nəsirovun “Xocalı bizim yaddaşımızdır”, Röya Hüseynovanın “26 ildir həsrətini çəkdiyimiz Xocalının bu günü” mövzusunda məruzələri dinlənilib.

BSU-nun magistratura şurasının hazırladığı bədii hissə ilə davam edən tədbirdə Xocalı faciəsinə dair videoçarx nümayiş olunub. Magistrantlar şəhidlərə həsr olunan şeirlər səsləndirib, bədii kompozisiya təqdim ediblər.