CƏMİYYƏT
Ramana qəsəbəsində qəyyumluqda yaşayan uşaqlarla görüş keçirilib
Bakı, 2 mart, AZƏRTAC
Sabunçu rayonu ərazisində yaşayan valideyn himayəsindən məhrum olan və qəyyumluğa verilmiş uşaqların yaşayış şəraitlərinin yoxlanılması, mənzil-məişət vəziyyətlərinə baxış keçirilməsi və ehtiyaclarının ödənilməsi məqsədi ilə həyata keçirilən “Qəyyumluqda olan hər uşağa diqqət və qayğı!” layihəsi həyata keçirilir.
AZƏRTAC xəbər verir ki, layihənin təşkilatçısı Sabunçu Rayon İcra Hakimiyyəti başçısının yanında qəyyumluq və himayəçilik komissiyası, Ailə, Qadın və Uşaq problemləri üzrə Dövlət Komitəsi, “Qızıl Aypara” Cəmiyyətinin Sabunçu rayon təşkilatı və yerli bələdiyyələrdir.
Ramana qəsəbəsində təşkil olunan növbəti görüşdə valideyn himayəsindən məhrum olan və qəyyumluğa verilmiş uşaqların yaşayış şəraitlərinə baxış keçirilib, mənzil-məişət vəziyyətləri yoxlanılıb, onlara müxtəlif hədiyyələr, ərzaq bağlamaları təqdim edilib və uşaqlarla söhbət aparılıb.