Bakı, 28 mart, AZƏRTAC

Sabunçu rayonunda rayon icra hakimiyyəti başçısının yanında qəyyumluq və himayəçilik komissiyası, Ailə, Qadın və Uşaq problemləri üzrə Dövlət Komitəsi, Azərbaycan Qızıl Aypara Cəmiyyətinin rayon təşkilatı və yerli bələdiyyələrin təşəbbüsü ilə “Qəyyumluqda olan hər uşağa diqqət və qayğı!” layihəsi həyata keçirilir.

AZƏRTAC xəbər verir ki, layihə çərçivəsində Bakının Bakıxanov qəsəbəsində yerləşən “Park Plyus” uşaq əyləncə mərkəzində valideyn himayəsindən məhrum olan və qəyyumluğa verilmiş uşaqlar üçün şənlik təşkil olunub.

Şənlik zamanı uşaqlar müxtəlif əyləncə qurğularında oyunlar oynayaraq şən musiqi sədaları altında rəqs ediblər.

Tədbirdə iştirak edən uşaqlara hədiyyələr verilib.