REGİONLAR
Hacıqabulda Bakının daşnak-bolşevik işğalından azad olunmasının 100 illiyi qeyd edilib
Hacıqabul, 14 sentyabr, Mahir Babayev, AZƏRTAC
“Türkiyə Universitetləri Məzunları” İctimai Birliyi (TUMİB) Hacıqabulda “Qafqaz Türk-İslam Ordusunun Bakı zəfərinin 100 illiyi” adlı mərasim keçirib.
AZƏRTAC-ın bölgə müxbiri xəbər verir ki, rayondakı Heydər Əliyev Mərkəzində təşkil olunan tədbirdə İctimai Birliyin sədri Çingiz Bayramov 1918-ci il sentyabrın 15-də Azərbaycanın Milli Ordusu Qafqaz İslam Ordusu ilə birlikdə güclü müqavimətə baxmayaraq, dörd mindən çox əsgər və zabiti şəhid vermək bahasına da olsa, Bakını və digər qəzaları daşnak-bolşevik işğalından azad etdiyini bildirib. Birliyin sədri gənclər arasında Qafqaz İslam Ordusu və onun Bakının azad edilməsi istiqamətində apardığı mübarizə barədə maarifləndirmə işinin aparılmasının önəmli olduğunu vurğulayıb.
Rayon icra hakimiyyəti başçısının müavini Zeynəb Yunisli tədbirdə çıxış edərək qeyd edib ki, Stepan Şaumyan 1918-ci ilin mart-iyul aylarında Bakı Sovetinə tabe olan daşnak silahlı dəstələrindən və bolşevik hərbi birliklərindən istifadə edərək Azərbaycanın Bakı, Şamaxı, Quba və başqa qəzalarında qırğınlar törədib, yüzlərlə yaşayış məskənini dağıdıb, dinc insanları amansızcasına qətlə yetirib. Lakin Azərbaycan və Türk əsgərlərinin, zabitlərinin igidliyi nəticəsində qısa müddətdə Bakı və digər əyalətlər ermənilərdən ibarət olan daşnak-bolşevik qüvvələrindən azad olunub.
Digər çıxış edənlər Azərbaycan ilə Türkiyə arasında dostluq, qardaşlıq münasibətlərinin gündən-günə daha da möhkəmləndiyini vurğulayıb, Azərbaycan Ordusunun öz sələflərinin yolunu şərəflə davam etdirdiyinə və yaxın gələcəkdə qəhrəman Azərbaycan əsgəri işğal altında olan ərazilərimizin düşmən tapdağından azad edəcəklərinə əminliklərini ifadə ediblər.
Tədbir başa çatdıqdan sonra rayonun Qubalıbaloğlan kəndində daşnaqlarla vuruşaraq qəhrəmancasına həlak olan Azərbaycan və Türk əsgərlərinin məzarları ziyarət olunub, şəhidlərin şərəfinə ucaldılan abidə önünə gül dəstələri qoyulub.