CƏMİYYƏT
Azərbaycan Qida Təhlükəsizliyi Agentliyinin nümayəndə heyəti Parisdə beynəlxalq təşkilatların rəhbərləri ilə görüşüb VİDEO
Paris, 28 mart, AZƏRTAC
Azərbaycan Respublikasının Qida Təhlükəsizliyi Agentliyinin (AQTA) sədri Qoşqar Təhməzlinin rəhbərlik etdiyi nümayəndə heyəti Fransada səfərdədir.
AZƏRTAC xəbər verir ki, agentliyin nümayəndə heyəti Avropa və Aralıq Dənizi Bitki Mühafizəsi Təşkilatının (EPPO) baş direktoru Nico Hornun və Ümumdünya Heyvan Sağlamlığı Təşkilatının (OIE) baş direktoru Monik Eluanın rəhbərlik etdiyi nümayəndə heyətləri ilə görüşüb.
Görüşlərdə Q.Təhməzli dövlət başçısı tərəfindən aparılan institusional islahatlar çərçivəsində yaradılmış Azərbaycan Respublikasının Qida Təhlükəsizliyi Agentliyinin missiyası və fəaliyyət istiqamətləri ilə bağlı iştirakçılara geniş məlumat verib.
Əhalinin sağlam qida məhsulları ilə təmin olunması istiqamətində agentlik tərəfindən həyata keçirilən tədbirlərdən, bitki mühafizəsi sahəsində mövcud vəziyyət və qarşıya çıxan problemlərdən bəhs edib. Bildirib ki, ölkəmizin 20 faiz torpaqları erməni işğalı altındadır və bu torpaqlar nəzarətdən kənar olduğu üçün bitki mühafizəsi sahəsində zərərvericilərə qarşı mübarizə aparmaq, onların qarşısını almaq mümkün deyil və bu fitosanitar nəzarət sahəsində və bitkiçilik məhsullarının ixracında müəyyən çətinliklərin yaranmasına səbəb olur. İşğal altında olan torpaqlarda bitki sağlamlığını təmin etmək və zərurət yarandıqda karantin tətbiq etmək hazırkı şəraitdə qeyri-mümkündür. Bildirilib ki, EPPO nüfuzlu beynəlxalq təşkilat kimi bu istiqamətdə öz missiyasına uyğun olaraq, müəyyən tədbirlər həyata keçirə və işğal olunmuş Azərbaycan torpaqlarında fitosanitar vəziyyəti diqqətdə saxlaya bilər.
Görüşdə EPPO-nun e-fresco Komissiyası çərçivəsində ölkəmizdə bitki sağlamlığı və fitosanitar nəzarət üzrə elmi tədqiqat işlərinin aparılmasına, eləcə də bitki sağlamlığı və fitosanitar nəzarət sahəsi üzrə kadr hazırlığına müvafiq texniki dəstək göstərməsinə dair müzakirələr aparılıb. “2020-ci il Beynəlxalq bitki sağlamlığı ili” üzrə EPPO-nun regional tədbirlərindən birinin Azərbaycan Respublikasında keçirilməsi təşəbbüsü irəli sürülüb.
Ümumdünya Heyvan Sağlamlığı Təşkilatının baş direktoru Monik Eluanın rəhbərlik etdiyi nümayəndə heyətləri ilə görüşdə heyvan sağlamlığı sahəsində həyata keçirilən tədbirlər və yeni yaradılacaq heyvanların identifikasiya sistemi ilə bağlı fikir mübadiləsi aparılıb. Eyni zamanda yeni yaradılacaq sistem çərçivəsində Abşeron yarımadasının “xəstəliklərdən azad zona” statusu almasına, Qida Təhlükəsizliyi İnstitutu ilə OIE-nin Elmi Komissiyası arasında əməkdaşlıq əlaqələrinin yaradılmasına, heyvan xəstəlikləri ilə mübarizə sahəsində elmi tədqiqatların aparılmasına, eləcə də heyvan sağlamlığı və baytarlıq nəzarəti üzrə kadr hazırlığı ilə bağlı müvafiq texniki dəstək göstərilməsi məsələləri müzakirə olunub. OIE-nin regional tədbirlərindən birinə Bakının ev sahibliyi etməsi təşəbbüsü irəli sürülüb.
Tərəflər müəyyən sahələr üzrə Tvinninq layihələrinin həyata keçirilməsinin mümkünlüyünə dair fikir mübadiləsi aparıblar.
Görüşdə qida təhlükəsizliyi sahəsində mövcud problemlər və onların birgə həll yolları müzakirə olunub. Qida təhlükəsizliyinin təmin olunmasında istehlakçıların fəal iştirakının vacibliyi vurğulanıb. İxtisaslaşmış ekspert və təcrübə mübadilələrinin əhəmiyyəti qeyd olunub.
Avropa və Aralıq Dənizi Bitki Mühafizəsi Təşkilatının (EPPO) baş direktoru Nico Horn və Ümumdünya Heyvan Sağlamlığı Təşkilatının (OIE) baş direktoru Monik Elua ölkəmizi yaxından tanıdıqlarını, xalqımızın qonaqpərvər olduğunu vurğulayaraq, əməkdaşlığın daha da dərinləşdirilməsində maraqlı olduqlarını, ölkəmizə lazımi dəstək verməyə hazır olduqlarını bildiriblər.
Şəhla Ağalarova
AZƏRTAC-ın xüsusi müxbiri
Paris