Pekin, 3 iyul, AZƏRTAC

Çinin şimal-şərqində yerləşən Lyaonin əyalətində tornado nəticəsində 6 nəfər həlak olub, 120-dən çox insan xəsarət alıb.

AZƏRTAC ÇXR Mərkəzi televiziyasına istinadla xəbər verir ki, tornado bu gün yerli vaxtla saat 17:15 (Bakı vaxtı ilə 13:15) radələrində Kayyuan qəzasında başlayıb. Küləyin sürəti saniyədə 23 metrə çatıb. Təxminən 15 dəqiqə sonra külək zəifləyib və şəhərin hakimiyyət orqanları yubanmadan fövqəladə hallara təcili reaksiya planını işə salıb.

Təbii fəlakət nəticəsində çoxsaylı binalar və elektrik şəbəkəsi zədələnib, 210 nəfər dağıntılar altında qalıb. Hazırda altı nəfərin öldüyü, 120-dən çox insanın zərər çəkdiyi təsdiqlənib.

Şahin Cəfərov

AZƏRTAC-ın xüsusi müxbiri

Pekin