Naxçıvan, 30 oktyabr, AZƏRTAC

Mətbuatdan da məlum olduğu kimi, Ermənistan tərəfi döyüşlərdə ölmüş əsgər və zabitlərinin meyitlərini götürməkdən imtina edir. Düşünürəm ki, bunun səbəbi erməni tərəfdən vuruşanlar arasında muzdluların və terror təşkilatlarının nümayəndələrinin olmasıdır. Yəqin, rəsmi İrəvan belə hesab edir ki, onsuzda terrorçuları Ermənistanda heç kəs axtarmayacaq və ya valideynləri onları tələb etməyəcək. Ona görə də meyitləri Azərbaycan tərəfindən təhvil almağa ehtiyac duymurlar. Bunun digər bir səbəbi isə Ermənistan hakimiyyətinin ölkəyə gələcək meyitlərin sayının çox olmasına görə əhalidə etirazların daha da artmasından və nəticədə, qiyamın baş verməsindən qorxmasıdır.

AZƏRTAC-ın Naxçıvan bürosuna müsahibəsində Yeni Azərbaycan Partiyası Sədərək Rayon Təşkilatının sədri Arif Qasımov deyib. O bildirib ki, bu gün Azərbaycan Ordusu yüksək döyüş hazırlığına malikdir. Ona görə də döyüş tapşırıqları yüksək səviyyədə həyata keçirilir. Bununla yanaşı, ötən illər ərzində ordumuz ən müasir silah və texnikalarla təchiz edilib. Həmin silahları döyüş meydanında tətbiq edən peşəkar hərbçilərimiz düşmən hədəflərini dəqiq zərbələrlə məhv edirlər. Bu səbəbdən Ermənistan ordusunda itkilərin sayı gündən-günə daha da artır. Baş nazir Nikol Paşinyan bu qədər itkinin səbəblərini erməni xalqına izah edə bilmir. Çünki dünənə qədər erməni əsgərinin şücaətindən, erməni ordusunun gücündən dəm vururdu. Həmin ordu ki, bu gün onun qeyri-peşəkar əsgər və zabitləri başqasının torpaqlarında qarışqa kimi qırılırlar. Onların maddi-texniki təminatı da sıfır səviyyəsindədir.

Yeni Azərbaycan Partiyası Sədərək rayon təşkilatının sədri qeyd edib ki, dəqiqləşdirilmiş rəsmi məlumatlarda da Ermənistan ordusunun itkiləri həm silah-sursat və hərbi texnika, həm də canlı qüvvə baxımından xeyli çoxdur. Azərbaycan Prezidenti, Ali Baş Komandan İlham Əliyevin oktyabrın 28-də Rusiyanın İnterfaks agentliyinə müsahibəsində bu barədə danışaraq deyib: "Baxın, hətta tam riyazi cəhətdən. 256 tank məhv edilib, bu, dünənki gün üçün olan məlumatdır. Hər gün bu rəqəm artır. Hesablayın, orada hərəsində 3-4 nəfər var. Bu, artıq təxminən min nəfər. Sonra 50-dən çox piyadaların döyüş maşını məhv edilib. Orada təxminən neçə nəfərin olduğu aydındır. Yüzlərlə artilleriya topları. Hər birində bir neçə nəfər. 6 ədəd S-300 qurğusu, 40-a yaxın “Osa”, “TOR”, “KRUQ”, “KUB” zenit-raket kompleksləri. 400, bəlkə də 400-dən çox yük maşını, onların böyük hissəsi məhv edilib, həm hərbi qulluqçularla, həm də döyüş sursatı ilə birgə. Əgər bunları hesablasaq, hələ nə qədər səngərlərdə məhv edilib. Axı, biz bu səngərləri, təmas xəttini keçmişik. Bu kadrlar internetdə var. Yəni, bizim məlumata görə, təkcə erməni tərəfinin itkisi 5 min və daha çox ola bilər, yaralananlar isə müharibədə bir qayda olaraq, 2-3 dəfə çox olur”.