DÜNYA
Hindistanda 20 COVID-19 xəstəsi oksigen çatışmazlığı səbəbindən xəstəxanada ölüb VİDEO
Pekin, 24 aprel, AZƏRTAC
Pandemiyanın 2-ci və daha ağır dalğasının yaşandığı Hindistanda COVID-19 infeksiyasına yoluxmaların, paralel olaraq ağır xəstələrin sayının sürətlə çoxalması xəstəxanalarda oksigen çatışmazlığına və bu səbəbdən ölüm hallarının artmasına gətirib çıxarıb.
AZƏRTAC Hindistan KİV-lərinə istinadla xəbər verir ki, aprelin 23-də paytaxt Dehlidəki “Jaipur” xəstəxanasının reanimasiya şöbəsində müalicə alan pasiyentlər üçün dəstəkləyici oksigen çatışmazlığından 20 nəfər COVID-19 pasiyent həyatını itirib. Tibb ocağının müfəttişi yerli mediaya açıqlamasında ağır xəstələr üçün oksigen ehtiyatının azaldığını təsdiqləyib.
“Jaipur” xəstəxanası son günlər oksigen ehtiyatının azalmasından şikayət edən tibb müəssisələrindən biridir. Aprelin 23-də xəstəxananın oksigen ehtiyatı ilə təminatı 7-8 saat gecikib və tələb olunan miqdarın cəmi 40 faiz təchiz olunub.
Bundan başqa, yerli KİV-lərdə “Ganga Ram” xəstəxanasında ağır vəziyyətdə olan 25 pasiyent də aprelin 22-23-də dəstəkləyici oksigen çatışmazlığından vəfat etdiyini yazıb. Xəstəxana rəsmiləri hələlik bu fakta münasibət bildirməyib.
Qeyd edək ki, Hindistanda COVID-19 virusuna sutkalıq yoluxma sayında son bir neçə gündür antirekord qeydə alınır. Elə ötən sutkada da belə olub. Hindistanın Federal Səhiyyə Nazirliyinin məlumatına əsasən, ötən gün ölkədə COVID-19 infeksiyasına 346 min 786 yoluxma aşkarlanıb. Bununla da Hindistan dünya üzrə COVID-19 virusuna gündəlik yoluxma antirekordunu yeniləyib.
Ötən sutka ölkədə COVID-19 infeksiyası səbəbindən 2624 ölüm qeydə alınıb. Bu rəqəm pandemiya dövründə Hindistanda gündəlik ən çox ölüm halı olmaqla yanaşı, ötən sutka dünya üzrə də ən böyük ölüm göstəricisi olub. İndiyədək Hindistanda COVID-19 infeksiyasına 16 milyon 610 min yoluxma, 189 min 544 ölüm qeydə alınıb. Hazırda ölkədə 2,5 milyondan çox aktiv xəstə var.
Şahin Cəfərov
AZƏRTAC-ın xüsusi müxbiri
Pekin