Çində şiddətli yağışlar səbəbindən ölənlərin sayı 25-ə çatıb VİDEO
Pekin, 21 iyul, AZƏRTAC
Çinin Henan vilayətində şiddətli yağışların törətdiyi fəsadlar səbəbindən ölənlərin sayı 25-ə, itkin düşənlərin sayı 7-yə çatıb.
AZƏRTAC xəbər verir ki, bu barədə vilayət təbii fəlakətlərlə mübarizə komissiyası məlumat yayıb. Vilayətin paytaxtı Cencouda mövsüm yağışlarının miqdarı 640 millimetrə çatıb ki, bu da təxminən illik normaya yaxındır. Yerli mətbuatın “Henanda əsrin fəlakəti” adlandırdığı şiddətli yağışlar səbəbindən 200 min nəfər təxliyə edilib, ümumilikdə, 1,2 milyon nəfər zərər çəkib.
Hazırda müvafiq qurumların əməkdaşları təbii fəlakətin nəticələrinin aradan qaldırılması ilə məşğuldur. Bu işlərə xeyli sayda hərbçi də cəlb olunub.
Qeyd edək ki, bir neçə gündür Henanda yağan şiddətli yağışlar səbəbindən vilayətdə ən yüksək səviyyədə xəbərdarlıq elan edilib. Binaların zirzəmilərinə və birinci mərtəbələrinə, mağazalara, restoranlara, hətta metro stansiyalarına yağıntı suları dolub. Cencouya və şəhərdən müxtəlif istiqamətlər üzrə 160 qatar, 260 təyyarə reysi ləğv edilib. Bundan başqa, şəhərdə ictimai nəqliyyatın hərəkəti dayandırılıb, magistral yollar bağlanıb.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
