REGİONLAR
El şənliklərinin sevimli kollektivi - “Çıraqqala” zurnaçılar ansamblı VİDEO
Şabran, 3 yanvar, Elxan Yusifli, AZƏRTAC
“Çıraqqala” zurnaçılar xalq kollektivi 1956-cı ildən fəaliyyət göstərir. Hazırda kollektivin 20-yə yaxın üzvü var.
AZƏRTAC-ın bölgə müxbiri xəbər verir ki, “Çıraqqala” zurnaçılar xalq kollektivi ilk yarananda ansamblın tərkibi yeddi nəfərdən ibarət olub. Bu kollektiv respublikamızın Əməkdar mədəniyyət işçisi, mahir zurna ifaçısı, mərhum Nurağa Rəhmanovun təşəbbüsü ilə Şabran rayon Mədəniyyət evinin nəzdində yaradılıb. Məşhur el sənətkarı, Azərbaycan, eləcə də qonşu Dağıstanda da qara zurnanın mahir ifaçısı kimi tanınan Ağası Ağasızadə, zurnaçılar Saməddin Vahabov, Sabir Səfərov, Əhməd Ağasıyev, Ömər Əkbərov və nağaraçalan Əlibaba Mürsəlov kollektivin ilk üzvləri idi.
Zurnaçılar ansamblı əvvəlcə yerli sakinlər qarşısında çıxış ediblər. Şabranlı kollektivin geniş tamaşaçı auditoriyası ilə ilk görüşü 1965-ci ildə Moldovanın paytaxtı Kişinyov şəhərində Azərbaycan mədəniyyəti günlərində olub. Ansambl o zaman korifey sənətkarlarımızdan Müslüm Maqomayev, Firəngiz Əhmədova, Şövkət Ələkbərova, Sara Qədimova, Lütfiyar İmanov, Rəşid Behbudov kimi adlı-sanlı ifaçılarla birgə təntənəli konsert proqramında zurna ilə “Kürdü- Şahnaz”ı ifa ediblər. Bundan sonra kollektivin Türkiyə və Hindistanda da musiqi folklor festivallarında uğurla iştirak edib.
Xalq yaradıcılığının inkişafındakı xidmətlərinə, sənət uğurlarına görə “Çıraqqala” zurnaçılar ansamblına 1987-ci ildə “Xalq kollektivi” adı verilib.
Kollektivin repertuarı əsasən xalq havalarından ibarətdir. Ansamblın proqramında “Şabran yallısı”, “Şabran təranələri”, “Mayili”, “Dəvəçi baharı”, “Dəvəçi rəqsi”, “Dədə Ağası” kimi musiqilər yer alır.
“Çıraqqala” zurnaçılar xalq kollektivi ənənəvi olaraq Bakıda keçirilən Novruz bayramı şənliklərində və folklor festivallarında çıxış edir.
2000-ci ildən kollektivə ustad el sənətkarı Ağası Ağasızadənin oğlu Rasim Ağasızadə rəhbərlik edir. Ötən müddət ərzində kollektivin tərkibinə yeni gənc istedadlar cəlb olunub. Hazırda kollektivin ən balaca üzvü 9 yaşlı Sadiq Ağasızadədir. O, el sənətkarı Ağası Ağasızadənin nəticəsidir. Kollektivdə Şabranla yanaşı, ətraf rayonların musiqiçiləri də təmsil olunur.
Kollektivin bədii rəhbəri Rasim Ağasızadə bildirib ki, onunla bərabər 7 qardaşı da musiqiçidir. Onları bəzən ailə ansamblı da adlandırırlar.
Bölmənin digər xəbərləri
