SİYASƏT
1993-cü il iyunun 15-i Azərbaycanın müstəqil dövlət kimi tərəqqisinin başlanğıc günü olaraq tariximizə qızıl hərflərlə əbədi həkk edilmişdir
Şəki, 13 iyun (AZƏRTAC). İyunun 13-də Şəkidə Milli Qurtuluş Günü münasibətilə yığıncaq keçirilmişdir.
AZƏRTAC xəbər verir ki, şəhər rəhbərliyi və ictimaiyyətin nümayəndələri əvvəlcə ümummilli lider Heydər Əliyevin icra hakimiyyətinin binası qarşısında ucaldılmış abidəsi önünə gül-çiçək dəstələri düzmüş, xatirəsini ehtiramla yad etmişlər.
Yığıncaqda “Heydər Əliyev müstəqil Azərbaycan Respublikasının xilaskarıdır” mövzusunda məruzə dinlənilmişdir. Məruzədə ötən əsrin 90-cı illərində respublikamızda baş verən ictimai-siyasi proseslər geniş təhlil edilmiş, ulu öndər Heydər Əliyevin müdrikliyi və qətiyyəti sayəsində ölkəmizdə vətəndaş qarşıdurmasına son qoyulduğu, Azərbaycanın müstəqilliyinin məhv olmaq təhlükəsindən azad olunduğu xüsusi vurğulanmışdır.
Qeyd olunmuşdur ki, 1993-cü ilin may-iyun aylarında respublikada hakimiyyət böhranı son həddə çatmışdı. Ölkə vətəndaş müharibəsi ilə üz-üzə qalmış, Azərbaycan dünyanın siyasi xəritəsindən silinmək təhlükəsi yaranmışdı.
Həmin təlatümlü günlərdə Azərbaycan xalqı qətiyyətlə ayağa qalxaraq dünyanın ən böyük siyasi xadimini-ulu öndər Heydər Əliyevi hakimiyyətə gətirdi. Azərbaycanın o zamankı dövlət rəhbərləri Heydər Əliyevi Naxçıvandan Bakıya dəvət etməyə məcbur oldular. 1993-cü il iyunun 15-də Heydər Əliyev Azərbaycan Respublikası Ali Sovetinin sədri seçildi. Dövlətimizin idarəçilik sükanı dahi dövlət xadiminin əlinə keçdi. Vətən, millət fəlakətdən xilas oldu, qurtuluş savaşında qələbəyə doğru dönüş başlandı. Məhz bu baxımdan 1993-cü il iyunun 15-i Azərbaycanın müstəqil dövlət kimi tərəqqisinin başlanğıc günü olaraq tariximizə qızıl hərflərlə əbədi həkk edilmişdir.
Qeyd olunmuşdur ki, bu gün ümummilli liderin bizlərə ərməğan etdiyi müstəqil Azərbaycan Respublikası Prezident İlham Əliyevin rəhbərliyi ilə daha da inkişaf edir, ölkəmiz gündən-günə çiçəklənir, qabaqcıl dünya dövlətləri sırasında öz yerini daha da möhkəmləndirir.
Yığıncağın sonunda ulu öndərin həyat və fəaliyyətindən bəhs edən “Əsrə bərabər ömür” sənədli filmi nümayiş etdirilmişdir.