İQTİSADİYYAT


Auditorlar Palatasının sədri Avrasiya Mühasiblər və Auditorlar Qrupunun sədr müavini seçilib

Auditorlar Palatasının sədri Avrasiya Mühasiblər və Auditorlar Qrupunun sədr müavini seçilib

Bakı, 28 fevral, AZƏRTAC

Bu günlərdə Avrasiya regionu ölkələrinin peşəkar mühasibatlıq və audit qurumları arasında əməkdaşlığın inkişaf etdirilməsi, onların fəaliyyətlərinin koordinasiyası, mühasibatlıq və audit peşəsinə olan ictimai etimadın yüksəldilməsi məqsədilə ötən il dekabrın 9-da yaradılan və Azərbaycan Respublikası Auditorlar Palatasının da üzv olduğu, hüquqi şəxs olmayan və ictimai əsaslarla fəaliyyət göstərən “Avrasiya Mühasiblər və Auditorlar Qrupu”nun ilk ümumi yığıncağı keçirilib.

Palatadan AZƏRTAC-a bildirilib ki, Rusiya Federasiyasının “Sodrujestvo” Özünütənzimləyən Auditorlar Assosiasiyasının təşkilatçılığı ilə onlayn formatda baş tutan tədbirdə Azərbaycan, Belarus, Qazaxıstan, Qırğızıstan, Ermənistan, Moldova, Özbəkistan və Rusiyanın peşəkar mühasibatlıq və audit qurumlarının rəhbər şəxsləri və nümayəndələri təmsil olunub. Yığıncaqda Azərbaycanın Auditorlar Palatası sədrinin müşaviri Fəqan Qarayev və Palata sədrinin elmi-metodik məsələlər üzrə müşaviri Nəcəf Talıbov iştirak ediblər. Tədbirin gündəlikdə olan birinci məsələsinə dair müzakirələrdə Rusiya Federasiyası Özünütənzimləyən Auditorlar Təşkilatlarının “Sodrujestvo” Assosiasiyasının idarə heyətinin sədri İqor Kozırev Avrasiya Mühasiblər və Auditorlar Qrupunun sədri, Azərbaycan Respublikasının Auditorlar Palatasının sədri Vahid Novruzov isə sədr müavini vəzifələrinə təklif olunublar. Təkliflər səsə qoyularaq hər iki namizəd yekdilliklə təklif edilən vəzifələrə seçiliblər.

Palata sədrinin müşaviri Fəqan Qarayev göstərilən etimada görə yığıncaq iştirakçılarına minnətdarlığını bildirib və Prezident İlham Əliyevin rəhbərliyi ilə Azərbaycanda auditor fəaliyyəti sahəsində əldə edilmiş nailiyyətlərdən, o cümlədən korrupsiyaya və çirkli pulların yuyulmasına qarşı mübarizədə, şəffaflığın artırılmasında və kölgə iqtisadiyyatının azaldılmasında ölkəmizdə uğurla həyata keçirilən islahatlardan, o cümlədən auditin rolundan bəhs edərək Azərbaycanın Auditorlar Palatasının Qrupun səmərəli fəaliyyətinin təşkilində yaxından iştirak edərək öz dəstəyini göstərəcəyini bildirib.

Daha sonra gündəlikdə olan 2-ci məsələ üzrə 2022-ci il üçün qrupun prioritet istiqamətləri və fəaliyyət planları üzrə təkliflərə və gündəlikdə olan 3-cü məsələ üzrə Avrasiya Mühasiblər və Auditorlar Qrupunun tərkibində Komissiyaların və İşçi Qruplarının yaradılması ilə bağlı təkliflərə baxılıb.

Azərbaycan Respublikası Auditorlar Palatasının Avrasiya Mühasiblər və Auditorlar Qrupunun “Rəqəmsal iqtisadiyyat şəraitində mühasibat uçotu və auditin transformasiyası üzrə komissiya”nın işinə rəhbərlik etməsi qərara alınıb.

Həmçinin Azərbaycan Respublikası Auditorlar Palatasının təşkilatçılığı ilə “Rəqəmsal iqtisadiyyat şəraitində hesabatlılıq və şəffaflıq” mövzusunda sentyabr ayında keçirilməsi nəzərdə tutulmuş beynəlxalq elmi-praktik konfrans Avrasiya Mühasiblər və Auditorlar Qrupunun 2022-ci il üzrə təsdiq edilmiş iş planına daxil edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.