Şagirdlərlə F.Köçərli yaradıcılığı ətrafında maraqlı diskussiyalar və müzakirələr aparılıb
Bakı, 11 mart, AZƏRTAC
İrəvan Müəllimlər Seminariyasının yaranmasının 140 illiyi ilə əlaqədar bir sıra orta məktəb və lisey şagirdləri martın 11-də F. Köçərli adına Respublika Uşaq Kitabxanasını ziyarət edib.
Kitabxanadan AZƏRTAC-a bildirilib ki, məktəblilərə 1885-1895-ci illərdə İrəvan gimnaziyasında ana dili və hüsnxət fənlərini tədris etmiş maarifçi, pedaqoq, uşaq folklor antologiyasının banisi Firidun bəy Köçərli haqqında elektron-məlumat baza, virtual sərgi, sənədli filmi təqdim edilib.
Tədbirdə bildirilib ki, Firidun bəy Köçərli ədəbi şəxsiyyətlər, bədii əsərlər, dərslik və tərcümələr haqqında, sülh və xalqlar dostluğu, qadın azadlığı, habelə məişət mövzularında onlarla maraqlı, aktual məqalələri ilə dövrünün ən fəal publisistlərindən biri olub. O, M.F.Axundzadə və M.Şahtaxtinskidən sonra Azərbaycan mədəniyyətinin inkişafı naminə əlifba islahatı aparılması yolunda çalışan xadimlərdəndir. İrəvan Gimnaziyasında işləyərkən Firidun bəy İrəvan ədəbi mühiti, xüsusilə məktəblərdə çalışan şairlərin yaradıcılığı ilə yaxından tanış olub və onların şeirlərini dinləyib.
Qeyd edilib ki, Azərbaycan türklərinin mənəvi mədəniyyətinin, xüsusən, ədəbi- elmi fikrinin inkişaf tarixində F.Köçərli millətin maariflənməsi və mədəni-siyasi tərəqqisi üçün bütün şüurlu həyatını və enerjisini sərf edən yorulmaz müəllim, yaşadığı dövrün ictimai problemlərinə fəal münasibət bildirən həssas yazıçı-publisist, tərcüməçi, nəhayət, istedadlı ədəbiyyatşünas- alim kimi tanınıb.
Sonda məktəblilərin iştirakı ilə F.Köçərli yaradıcılığı ətrafında maraqlı diskussiyalar və müzakirələr aparılıb.
Bölmənin digər xəbərləri
