İstanbul, 29 aprel, AZƏRTAC

İstanbulun Tuzla rayonunda yerləşən üçmərtəbəli boya fabrikində yanğın baş verib.

AZƏRTAC xəbər verir ki, əraziyə çox sayda yanğınsöndürən və təcili tibbi yardım briqadaları cəlb olunub.

Yanğını söndürmək mümkün olub, hazırda soyutma işləri aparılır.

İstanbul Valiliyindən hadisə ilə bağlı verilən açıqlamada bildirilib ki, yanğın baş verən zaman binada olan işçilərdən üçü ölüb, doqquzu yaralanıb. Daha üç nəfərin axtarışları davam edir.

Fabrikdən çıxan alov ətrafdakı iş yerləri və meşəlik ərazilərə sıçrayıb.

Faktla bağlı araşdırma aparılır.

Günel Məlikova

AZƏRTAC-ın xüsusi müxbiri

İstanbul