22 Aprel - Beynəlхalq Yer Günüdür
Bakı, 19 aprel (AZƏRTAC). Ekologiya və Təbii Sərvətlər Nazirliyi hər il 22 Aprel - Beynəlxalq Yer Günü ilə əlaqədar müxtəlif tədbirlər həyata keçirir, ətraf mühitin mühafizəsi sahəsində ictimaiyyət arasında təbliğat işləri aparır.
Nazirliyin mətbuat xidmətindən AZƏRTAC-a bildirmişlər ki, bu il də Beynəlxalq Yer Günü ilə əlaqədar paytaxtda və regionlarda ictimaiyyət nümayəndələri ilə birgə iməciliklər keçirilərək yaşıllıqlara qulluq edilir, təmizlik işləri aparılır, təhsil müəssisələrində ekoloji təbliğat xarakterli dəyirmi masalar, görüşlər, seminar məşğələlər təşkil edilir.
Bu əlamətdar günün keçirilmə ənənələri ХIХ əsrin 40-cı illərinə təsadüf edir. Belə ki, o dövrdə ABŞ-ın Nebraska ştatının sakini Corc Morton yaşıllaşdırma gününün keçirilməsini təklif etmişdir. Nebraska ştatında 1882-ci ildə 22 aprel tarixi rəsmi olaraq “Ağac günü” kimi qeyd olunmağa başlanılmış, 1970-ci ildə isə senator Geylord Nelsonun təklifinə əsasən, ekoloji problemlərə diqqəti artırmaq məqsədi ilə həmin günün adı dəyişdirilərək, “Yer günü” adlandırılmışdır.
“Yer günü”nün əsas mövzusu 1990-cı ildən başlayaraq təbii mühiti ilkin formada qoruyan milli parklara həsr edilmişdir. Məqsəd xüsusi mühafizə olunan təbiət ərazilərində mövcud olan problemlərə maliyyə yardımının göstərilməsinə ictimaiyyətin diqqətinin cəlb edilməsi olmuşdur.
Tədricən bu bayram beynəlxalq xarakter alaraq, hazırda 150-yə yaxın ölkədə, o cümlədən Azərbaycanda qeyd olunur. Ekoloqlar kütləvi aksiyalar keçirməklə, kütləvi informasiya vasitələrində çıxışlar etməklə əhalini ətraf mühitin mühafizəsi sahəsində daha fəal olmağa çağırırlar.
Bölmənin digər xəbərləri
