Türkiyə Prezidenti: Zəlzələ səbəbindən universitetlər məsafədən təhsilə keçəcək VİDEO
Bakı, 11 fevral, AZƏRTAC
Zəlzələ səbəbindən Türkiyə universitetlərində tamamilə məsafədən təhsilə keçiləcək, təbii fəlakət nəticəsində evsiz qalanlar tələbə yataqxanalarında yerləşdiriləcək.
AZƏRTAC xəbər verir ki, Türkiyə Prezidenti Rəcəb Tayyib Ərdoğan bunu zəlzələ bölgəsinə səfəri zamanı Diyarbakırda çıxışında bildirib. O qeyd edib ki, Kahramanmaraş zəlzələsi yaddaşlarda ən böyük fəlakət kimi qalan 1999-cu il zəlzələsindən üçqat daha böyük və üçqat daha dağıdıcıdır.
Dövlətin bütün imkanlarını səfərbər etdiyini vurğulayan Rəcəb Tayyib Ərdoğan deyib: “Bizə güvənin, bizə inanın. Biz vətəndaşımızı darda, küçədə buraxmadıq və buraxmayacağıq. Biz yüz minlərlə binanı yenidən inşa edəcəyik. Zəlzələdə böyük dağıntılara məruz qalan şəhərlərimizi yenidən qurmaq üçün planlar hazırlayırıq”.
Türkiyə Prezidenti axtarış-xilasetmə işlərinin yekunlaşdığı bölgələrdəki heyətlərin daha ağır vəziyyətdə olan Kahramanmaraş, Hatay və Adıyamana göndərildiyini söyləyib.
Bölmənin digər xəbərləri
