Yumurta deyib keçməyin – Xaçmazlı ABAD-çının qeyri-adi əl işləri VİDEO
Xaçmaz, 15 fevral, Elxan Yusifli, AZƏRTAC
Xaçmazlı elektrik mühəndisi Fərmayıl Əhmədov toyuq, qaz, ördək və başqa quşların yumurtalarından istifadə etməklə bir-birindən maraqlı suvenirlər hazırlayır.
AZƏRTAC-ın bölgə müxbiri xəbər verir ki, istedadlı gənc bu işi internet vasitəsilə öyrənib. Dediyinə görə, ölkəmizdə belə suvenirləri təkcə ondan başqa hazırlayan yoxdur. Əvvəllər həvəskar şəkildə bu işlə məşğul olan gənc indi əl işlərini daha da təkmilləşdirib.
On ildir suvenir hazırlayan Fərmayıl indi yumurtanın üzərinə zər, boya və xüsusi bəzək daşları ilə daha mürəkkəb naxış və elementlər əlavə edir. Bəzi böyük yumurtalardan isə suvenirlər üçün qablar düzəldir.
Bildirir ki, yumurtanın qabığı zərif olduğundan diqqətlə və səbirlə çalışmaq lazımdır. Əl işləri sadə görünsə də, bir suvenirin hazırlanması üçün 3-4 saat, on gün vaxt sərf edir.
“Əl işləri üçün səthi daha təmiz, möhkəm qabıqlı yumurtaları seçirəm. Daha çox ördək, böyük işlər olanda isə qaz, hətta dəvəquşu yumurtasından istifadə edirəm. Suvenir hazırlamaq üçün əvvəlcə yumurtanın içərisi boşaldılır. Bunun üçün yumurtanın hər iki tərəfindən kiçik deşiklər açılmalıdır. İçərisindəki maye süzüldükdən sonra yumurtanın üzərinə eskiz çəkilmiş kağız yapışdırılır. Ya da eskiz birbaşa qabığın üzərinə çəkilir. Bundan sonra yumurtanın qabığı manikür üçün istifadə olunan xüsusi avadanlıqla oyulur. Üzərində bir-birindən gözəl naxışlar yaranan yumurta diqqətçəkən suvenirə çevrilir. Amma iş bununla tamamlanmır. Son mərhələdə hazır suvenir xüsusi maddə ilə yuyulur ki, bu da əl işinin möhkəmliyini və bakteriyalardan qorunmasını təmin edir”, - deyə Fərmayıl Əhmədov söyləyir.
Fərmayıl bu vaxta kimi yumurtadan 100-dən çox əl işi hazırlayıb. Suvenirlər daha çox xarici ölkə vətəndaşlarına satılır.
“Artıq 4 ildir “ABAD”çıyam. Satış bazarını genişləndirmək və əl işlərimi dünyaya daha çox tanıtmaqda ABAD (Ailə Biznesinə Asan Dəstək) ailəsinə qoşulmağım mənə çox kömək oldu. Hazırladığı suvenirlər ABAD-a məxsus etno-butiklərdə satışa çıxarılır. Əl işlərimin müştəriləri daha çox əcnəbi vətəndaşlar olur. Bəzən xarici turistlər eyni vaxtda 2-3 əl işimi alırlar”, - deyə xaçmazlı ABAD-çı əlavə edir.
Fərmayılın hazırladığı bir ədəd suvenir yumurta 26 manata satılır. Amma böyük ölçülü və daha çox naxışlarla bəzədilən suvenir yumurtaların qiyməti 2-3 dəfə bahadır. O, son əl işlərindən birinə 100 manat qiymət qoyub.
Yumurtadan hazırlanan əl işləri içərisində gecə işıqları və üzərində tanınmış şəxsiyyətlərin portretləri əks olunan suvenirlər daha çox diqqət çəkir.
“Son əl işim Ümummilli Lider Heydər Əliyevin 100 illik yubileyinə həsr olunub. Şuşa şəhərinin düşməndən azad olunması münasibətilə də maraqlı suvenir hazırlamışam. Mənim oyma sənətinə, ümumiyyətlə incəsənətə böyük marağım var. Kiçik ağac lövhələrdən, daşlardan, qoz qabığından da suvenirlər, müxtəlif tablolar hazırlamağı bacarıram”, - deyə Fərmayıl Əhmədov vurğulayır.
Qeyd edək ki, Azərbaycan Texniki Universitetinin məzunu olan Fərmayıl Əhmədov elektrik mühəndisi kimi fəaliyyət göstərir.
Bölmənin digər xəbərləri
