Kiyev, 10 iyun, AZƏRTAC

Rusiya silahlı qüvvələri iyunun 10-na keçən gecə pilotsuz təyyarələrlə Odessa vilayətinə hücum edib. Hava hücumundan müdafiə qüvvələri bütün düşmən hədəflərini məhv edib.

AZƏRTAC xəbər verir ki, bu barədə “Cənub” Əməliyyat Komandanlığı məlumat yayıb.

Hava Hücumundan Müdafiə Qüvvələri Odessa bölgəsi üzərində bütün “Şahed-131/136”nı vurub, lakin dronların qalıqlarının düşməsi nəticəsində çoxmərtəbəli binada yanğın baş verib.

“50 kvadratmetr ərazini əhatə edən yanğın dərhal söndürülüb. 3 mülki şəxs həlak olub. 10-dan çox insan yaralanıb”, -deyə məlumatda bildirilir.

Qeyd olunur ki, partlayış nəticəsində bir neçə yaşayış binasına ziyan dəyib. Hazırda zərərçəkənlərlə bağlı yekun məlumat dəqiqləşdirilir.

Emil Hüseynli

AZƏRTAC-ın xüsusi müxbiri

Kiyev