“Gil qablar üzərində obrazlar yaradarkən, onlarla xəyalımda söhbətləşirəm” - keramika ustası FOTO VİDEO
Şəki, 17 iyun, AZƏRTAC
Şəki dünyada bənzəri olmayan 19 sənətkarlıq nümunəsini özündə yaşadır. Bu şəhər həm də Cənubi Qafqazda ilk Keramika Mərkəzi kimi tanınır.
AZƏRTAC xəbər verir ki, 2018-ci ildə “ABAD” Keramika və Tətbiqi Sənət Mərkəzinin məhz Şəkidə fəaliyyətə başlaması, ilk Beynəlxalq Keramika Simpoziumunun da bu şəhərdə keçirilməsi heç də təsadüfi deyil. Çünki Şəkinin tarixi, şəhərsalma mədəniyyəti, özünəməxsus memarlıq üslubu, sənətçilik ənənələri var. Digər tərəfdən keramika sənəti ənənələrinin davam etdirilərək gələcək nəsillərə ötürülməsində Şəki sənətkarlarının rolu böyükdür.
Cənubi Qafqazın ilk keramika mərkəzinin qısa müddətdə nailiyyətləri az deyil, onu yaşadan, inkişaf etdirən sənətkarlar bir çox uğurlu layihələrə imza atıblar.
Belə gənc sənətkarlardan biri də Kamran İbrahimxəlilovdur. O, hər gün işə gələr-gəlməz, önlüyünü əlinə alıb dünən yarıda buraxdığı əl işini dönə-dönə gözdən keçirir və daha nələri əlavə edəcəyini düşünür.
Bəzən başladığı işləri səhərə kimi beynində dəfələrlə “söküb-yığır” - bezmir, yorulmur sənətindən.
O, xalçaçı rəssamlıqdan keramika sənətinə uzanan yolu addım-addım keçib. İxtisasca xalçaçı rəssam olsa da, taleyini keramika sənətinə bağlayıb. Bir zaman həyət-bacada uşaqlarla oynayarkən palçıqdan düzəltdiyi fiqurları indi gildən hazırlayır, həm də min bir naxış, min bir rənglə...
Kamran İbrahimxəlilov 2018-ci ildə Şəkidə “ABAD” Keramika və Tətbiqi Sənət Mərkəzinin fəaliyyətə başlayacağını eşidəndə fikirləşmədən sənədlərini komissiyaya təqdim edir. Burada isə elə sənətkarlar təmsil olunurdu ki, Kamranın ilk baxışda müsabiqədən keçəcəyi inanılmaz görünürdü. Lakin qısa müddətdə özünü göstərə bildi və ilk işlərini tərəddüdlə olsa belə təqdim etdi. Ustadların müsbət rəyləri onu daha ciddi sənət əsərləri üzərində işləməyə sövq elədi. Artıq o vaxtdan bəri 5 ilə yaxın zaman keçib və Kamran hər gün-hər ay üzərində işləyir, əl bacarığını təkmilləşdirir.
“Əsərlərimi hazırlayarkən oradakı obrazlarla xəyalımda söhbətləşirəm, onları fərqli yaratmaq üçün bir cizgini bəzən bir neçə dəfə təkrar işləyirəm”, - deyir Kamran İbrahimxəlilov. Digər tərəfdən keramikanın sirlərinə bələd olduqca onun insan ruhuna nə qədər mənəvi qida verdiyinin şahidi olur.
Adətən, sənət adamları bitməyən işləri haqqında danışmağı sevməsələr də, Kamran düşüncəsində tamamladığı əsərinin ssenarisini bizimlə bölüşür: “İşlədiyim bu vaz naxışlardan ibarətdir. Ornament sənətinə yaxın bir sənətdir, sadəcə yanaşma fərqlidir. Belə ki, detallar gilin, yəni vazın üzərində məsafəli işlənib. Bu işləmə mənə məxsusdur. İşin bədii tərəfinə, mövzusuna gəldikdə, o, “Nağıl” adlanır. Çalışmışam ki, nağıl qəhrəmanlarını vazın üzərində əks etdirim”.
Qeyd edək ki, “ABAD” Keramika və Tətbiqi Sənət Mərkəzində hazırlanan əl işləri əvvəlcə burada təşkil edilən sərgidə yerli və xarici qonaqlara təqdim olunur. Dekorativ-tətbiqi xalq sənətkarlığının müxtəlif texnikalarında işlənilib hazırlanan bu məhsulların hər biri sərgidən sonra “ABAD” etno-butiklərində satışa çıxarılır.
Gənc keramika ustası Kamran İbrahimxəlilovun əl işləri nəinki ölkəmizdə, eləcə də xaricidə dəfələrlə sərgi və müsabiqələrdə nümayiş etdirilib, eləcə də butiklərdə dəyərli əsərlər kimi öz alıcısını tapıb.
Bölmənin digər xəbərləri
