Bakı, 3 avqust (AZƏRTAC). Heydər Əliyev Fondunun təşəbbüsü ilə hər il Qəbələdə keçirilən Beynəlxalq Festival artıq Azərbaycanın hüdudlarından kənarda geniş şöhrət qazanmış, dünyanın mədəni həyatında əlamətdar hadisəyə çevrilmişdir. Milyonlarla tamaşaçı auditoriyası olan populyar “Euronews” telekanalında yayımlanmış reportaj da festivala böyük maraq olduğunu təsdiq edir.

AZƏRTAC xəbər verir ki, reportajın müəllifi - “Euronews”un müxbiri Qalina Polonskaya bildirir ki, Azərbaycanın cənnət guşəsi olan Qəbələ şəhərində artıq beşinci dəfədir ki, Beynəlxalq Musiqi Festivalı keçirilir. Musiqiçilər açıq səma altında səhnədə və kamera konsert salonlarında çıxış edirlər.

Süjetdə festival sayəsində klassik musiqi dünyasını kəşf etmiş və hazırda bir konsert belə buraxmayan inşaatçı Nəmisat Kərimovun ailəsindən danışılır. N.Kərimov təəssüratlarını “Euronews”un müxbiri ilə bölüşərək demişdir: “Biz festivalın nə zaman başlayacağını ailəliklə səbirsizliklə gözləyirik. Klassik musiqi bizə sevinc bəxş edir - qəlbimiz oxuyur”.

Reportajda vurğulanır ki, Qəbələdə Beynəlxalq Klassik Musiqi festivalı iştirakçılarının coğrafiyası ilbəil genişlənir. Burada havanın xoşagəlməz sürprizləri ilə qarşılaşmırsan, ona görə də bütün konsertlər və məşqlər təmiz dağ havasında keçirilir.

Tanınmış violonçelist və Qəbələ festivalının bədii rəhbəri Dmitri Yablonski telekanalın müxbirinə müsahibəsində demişdir ki, onun 400 yaşlı musiqi aləti dağ gölünün sahilində çox gözəl səslənir. Onun fikrincə, bu yerlərin gözəlliyi və festivalda səslənən musiqi qarşılıqlı surətdə bir-birini tamamlayır. D.Yablonski demişdir: “Təbiətin qoynunda məşq etmək fövqəladə ruh yüksəkliyi bəxş edir. Azərbaycanın təbiəti unikaldır: 11 iqlim qurşağından 9-u buradadır. Dağların hündürlüyü 5 min metrə çatır. Biz hətta səhnəni də elə qurmuşuq ki, dağları tamaşaçılar deyil, musiqiçilər görsünlər. Tamaşaçılar yalnız otelləri görürlər, biz isə səhnədə bu valehedici və əzəmətli dağlardan zövq alırıq”.

“Euronews”un reportajında Azərbaycan muğamından da danışılır. Bildirilir ki, bu mürəkkəb musiqi janrının əsası improvizasiya məharətinə söykənir. Telekanal Azərbaycanın tanınmış xanəndəsi Mənsum İbrahimovu tamaşaçılara təqdim edir. O, muğam sənəti, onun Azərbaycan xalqı və onun musiqi mədəniyyəti üçün əhəmiyyətindən danışır.

Süjetdə festivalın digər iştirakçılarından, Qəbələyə ilk dəfə gəlmiş məşhur türk pianoçusu İdil Biretdən, bu il yaradılmasının 75 illiyini qeyd edən, tanınmış Britaniya dirijoru Yan Latan-Kyöniqin rəhbərlik etdiyi Qüds Simfonik Orkestrindən danışılır. Dirijor demişdir: “Musiqiçi kimi mən bir mühüm qaydanı mənimsəmişəm: tamaşaçıya biganə yanaşmaq olmaz. Tamaşaçı auditoriyası hətta musiqi əsərləri ilə tanış olmasa belə, onda elə bir instinkt vardır ki, bizim qarşıya qoyduğumuz vəzifənin öhdəsindən nə dərəcədə gəldiyimizi hiss edir”.

Reportajın müəllifi Qəbələ camaatının səmimiliyini, onun klassik musiqiyə böyük marağını vurğulayır.