Muzeylər şəhəri Şəki Ramazan bayramı günlərində daha da canlanıb VİDEO
Şəki, 13 aprel, AZƏRTAC
Baharın gəlişinə təsadüf edən Ramazan bayramında bir həftəyə yaxın tətil olduğundan insanlar daha çox bölgələrə üz tuturlar. Qədimliyi qədər turizm potensialı zəngin olan Şəki bu mənada bölgələrimiz sırasında ən çox ziyarət olunan məkanlardan sayılır.
AZƏRTAC xəbər verir ki, Ramazan bayramı ilə əlaqədar artıq bir neçə gündür rayonda canlanma hiss olunur.
Şəkinin flora və faunası kimi tarixi irsi də buraya gələn hər bir turistin qəlbində xoş iz buraxır. Artıq on illərdir ki, bu şəhər beynəlxalq turizm marşrutlarında ön sıralarda dayanır. Başlıca səbəblərindən biri Şəkinin muzeylər şəhəri kimi tanınması eləcə də burada dünya memarlıq abidələrinin yerləşməsi göstərilir. Bu şəhər həm də Kiş Alban məbədinin simasında dünyaya tolerantlıq nümunəsi, simvolu kimi öncüllük edir.
Pandemiyadan sonrakı illərə nəzər salsaq görərik ki, Şəkidə iri otellər deyil, daha çox motel və hostellər istifadəyə verilir. Turizm meneceri Yusif Yusifovun sözlərinə görə, artıq onların sayı 50-ə çatıb və bəlkə də bu il bir qədər də çoxalacaq. O, turistlərin fərdi evlərə də maraq göstərdiyini diqqətə çatdırıb. Turizm meneceri bildirir ki, Şəkidə bir gecə istirahət etmək üçün hər büdcəyə uyğun qiymətlər mövcuddur. Hostellərdə qiymətlər adambaşı 15-30 AZN arası dəyişir. Şəxsi evlərin qiyməti günü 70-80 manatdan başlayır. Villalarda isə 300-350 manata kimi qalxan qiymətlərə təsadüf etmək mümkündür.
Fərdi evlərə, xüsusən kənd evlərinə marağın niyə bu qədər çoxalması ilə bağlı sualımıza cavabında Kiş kənd sakini Xan İlyasov deyib: “Kiş kəndi çox mənzərəli bir yerdə yerləşdiyi üçün bura turistlərin axını daha güclüdür. Turistlərin əksəriyyəti istəyir ki, fərdi evlərdə yaşasın, kənd həyatı ilə tanış olsun. Milli xörəklərin hazırlanması qaydası, qışa tədarük, turşuların, mürəbbələrin hazırlanması onlarda daha çox marağa səbəb olur. Burada meyvə və giləmeyvələr bol olduğundan turistlər belə evlərə üstünlük verirlər. Onlar həm istirahət edirlər, həm də qış ehtiyatlarını görürlər”. Kiş sakini Xan İlyasov kənddə şəraitinə görə müxtəlif qiymətə ev tapmağın mümkün olduğunu vurğulayıb.
Azərbaycanda ilk ailə turizminin yaradıcılarından biri olan İlhamə Hüseynova artıq 23 ilə yaxındır bu sahədə fəaliyyət göstərir. Kənd-yaşıl turizmi istiqamətində layihələr həyata keçirən bu iş qadını doğulduğu kəndin, Şəkinin və ölkəmizin mili-mənəvi dəyərləri ilə yanaşı, həm də mətbəxini təbliğ edir.
“Təcrübəmə əsasən bilirəm ki, turistlər son dövrlər otellərdən daha çox fərdi evlərə üstünlük verirlər. Burada 5-6 evimiz var və turistlərin gecələməsi üçün lazımı şərait yaradılıb”, - deyən İlhamə Hüseynova sözlərinə görə, xarici turistlərə əsasən milli mətbəximizlə bağlı master-klaslar keçirlər ki, bu da onların ən çox maraq göstərdiyi bir işdir.
Şəkidə dünya standartlarına cavab verən otellər də az deyil. Hətta onların sırasında müalicəvi istirahət kompleksi də fəaliyyət göstərir. Bu günlərdə həmin otellərin də müştəriləri boldur.
“Marxal” müalicə-istirahət kompleksinin meneceri Kamal Hüseynovla söhbətdən bəlli olur ki, bayramla əlaqədar hazırda yerli və xarici turistlərin sıxlığı müşahidə olunur: “Asiya və Avropadan gələn xarici turistlərdən çoxluq təşkil edir. Sırf bayramla əlaqədar oteldə doluluq müşahidə olunur. Qonaqlar üçün həm xidmət, həm də keyfiyyət önəmlidir. Biz də öz xidmət və keyfiyyətimizi hər il olduğu kimi qoruyub saxlayırıq. Qiymətlərimiz də demək olar sabit qalır”.
Bəs turistlər ölkəmizdən, qonağı olduqları Şəkidən və göstərilən xidmətlərdən razıdırlarmı? Dubaydan bir həftəlik istirahətə gələn Proti Hall ailəsi ilə söhbətimizdə bu suala cavab axtarırıq. Azərbaycanı, Şəkini seçmələrində yanılmadıqlarını deyirlər və belə yüksək xidmətdən məmnun qaldıqlarını ifadə edirlər. Ailə üzvləri mətbəximizdən danışarkən heyran olduqlarını gizlətmirlər.
Şəkini ziyarət edənlər, istər tarixi, istərsə də digər infrastrukturu ilə tanış olan hər kəs bilir ki, burada qonağın məmnuniyyəti çox önəmlidir. Bu səbəbdəndir ki, bu bayram günlərində şəhərin istənilən istirahət mərkəzlərində sıxlıq müşahidə olunur. Əlbəttə ki, Şəki mətbəxi və şirniyyatları da bu məmnunluğa öz dadını qatır. Şəkiyə gələn hər kəs bir də geri dönmək arzusu ilə bu şəhəri tərk edir.
Bölmənin digər xəbərləri
