İQTİSADİYYAT
2 turagent və 4 otel şəffaf vergi partnyoru statusu ilə bağlı müraciət edib
Bakı, 11 aprel, AZƏRTAC
Ölkə rəhbərliyi tərəfindən aparılan iqtisadi islahatlar nəticəsində son illərdə təkcə paytaxt Bakıda deyil, respublikamızın regionlarında da turizm fəaliyyəti ilə məşğul olan iş adamlarının sayı artır, çoxlu turizm obyektləri istifadəyə verilir.
Vergilər Nazirliyinin Media və Kommunikasiya Mərkəzindən AZƏRTAC-a bildirilib ki, bunu aprelin 11-də turagentlər və otel fəaliyyəti ilə məşğul olan vergiödəyiciləri üçün Vergilər Nazirliyi ilə Azərbaycan Turizm Assosiasiyasının birgə təşkil etdiyi görüşdə nazirliyin Lokal Gəlirlər Departamentinin baş direktoru Nəsimi Cəfərov deyib.
Bildirilib ki, bu obyektlər arasında dünya brendləri hesab edilən turizm mərkəzləri və otellər də var. Görüş iştirakçılarına vergi sistemində aparılan islahatlar, vergi orqanları ilə vergiödəyiciləri arasında partnyorluq münasibətlərinin genişləndirilməsi istiqamətində aparılan işlər barədə məlumat verilib.
Qeyd edilib ki, vergi daxilolmalarının icrası prosesində vergi orqanları daha çox nəzarət tədbirlərinə deyil, vergiödəyiciləri ilə partnyorluq münasibətləri çərçivəsində vergilərin könüllü ödənilməsinin inkişafına nail olmağa çalışırlar.
Tədbirdə vurğulanıb ki, 2017-ci ildən şəffaf vergi partnyorluğu əsasında fəaliyyət göstərən vergiödəyicilərinə “Yaşıl dəhliz” prinsipi ilə xidmətlər göstərilir.
Partnyor ödəyicilərə ənənəvi xidmətlərlə yanaşı, İKT-nin son nailiyyətlərinə əsaslanan innovativ xidmətlər də təqdim edilir. Belə xidmətlərə videobağlantılar, Çağrı və xidmət mərkəzlərində partnyor ödəyicilərə növbəsiz və sürətli xidmətlərin göstərilməsi, partnyor ödəyicilərin müraciəti əsasında onlar üçün “dəyirmi masa”, seminar və konfransların təşkili, xüsusi təlim proqramlarının hazırlanması və s. aiddir. İntizamlı vergiödəyicisi olmağın üstünlüklərindən söz açan N.Cəfərov departamentin qeydiyyatında olan vergiödəyiciləri arasında 1 turagentin və 3 otelin şəffaf vergi partnyoru statusuna malik olduğunu, daha 2 turagent və 4 otelin bu statusu almaq üçün müraciət etdiyini və hazırda onların göstəricilərinin təhlil olunduğunu söyləyib.
Vergi Məcəlləsinə edilmiş əlavə və dəyişikliklər, eləcə də “Nağdsız hesablaşmalar haqqında” Qanuna edilmiş dəyişikliklərlə bağlı fikirlərini bölüşən departament direktoru turagentlərə ödəmələrin yalnız nağdsız qaydada həyata keçirilməli olduğunu vurğulayıb, turagentlərin və otellərin fəaliyyət sahələrinə aidiyyətı olan digər qanunvericilik aktlarında edilmiş dəyişikliklər də görüş iştirakçılarının nəzərinə çatdırıb.
Tədbirdə həmçinin aprelin 10-dan başlayaraq 1 ay müddətində Bakı şəhərində ticarət festivalının keçirildiyi və bu festival zamanı xarici vətəndaşlarla yanaşı, yerli əhali tərəfindən də müəyyən olunmuş ticarət obyektlərindən alınmış mallara görə ƏDV-ni geri ala biləcəyi barədə məlumat verilib. Nəticə etibarilə bu festivalların otel, turagent, iaşə və digər sahələrin inkişafına da müsbət təsir göstərəcəyi qeyd olunub.
Ölkəmizdə turizm sektorunun inkişafına müsbət təsir göstərən amillərdən biri də 2016-cı ildən etibarən respublikamızda tətbiq edilən “Tax free” sistemidir. Qeyd edilib ki, “Tax free” sisteminin tətbiqi xarici turistlərin ölkəyə cəlb edilməsinə və onların ölkə ərazisində daha çox mal almaqla, pərakəndə ticarətdə satış dövriyyəsinin artırılmasına, ixracyönümlü istehsalın stimullaşdırılmasına, xarici valyutanın ölkəyə axınının artmasına şərait yaradır. “Tax free” sistemində ƏDV-nin qaytarılması üçün əsasən hava limanlarında xüsusi məntəqələr yaradılıb. Bu sistem ölkəmizə gələn turistlər arasında böyük marağa səbəb olub.
Görüşdə Azərbaycan Turizm Assosiasiyasının nümayəndələri də çıxış edib.