ELM VƏ TƏHSİL
Bakıda “Almaniyada doktorantların təhsili və elmi-tədqiqat imkanları” mövzusunda seminar keçirilmişdir VİDEO
Bakı, 20 sentyabr (AZƏRTAC). Sentyabrın 20-də Azərbaycan Milli Elmlər Akademiyasının (AMEA) İnformasiya Texnologiyaları İnstitutunun və Alman Akademik Mübadilə Xidmətinin (DAAD) birgə təşkilatçılığı ilə “Almaniyada doktorantların təhsili və elmi-tədqiqat imkanları” mövzusunda seminar keçirilmişdir.
AZƏRTAC xəbər verir ki, seminarda Alman Akademik Mübadilə Xidmətinin Bakı Məlumat Mərkəzinin, AMEA rəyasət heyəti mərkəzi aparatının təmsilçiləri, institut və təşkilatların doktorantları, dissertantları, alim və mütəxəssisləri, mətbuat nümayəndələri iştirak etmişlər.
Tədbirdə İnformasiya Texnologiyaları İnstitutunun mühəndisi, texnika üzrə fəlsəfə doktoru Rəşid Ələkbərov son vaxtlar institutda beynəlxalq əməkdaşlıq çərçivəsində həyata keçirilən layihələrdən söz açmışdır. Bu gün Azərbaycan alimlərinin beynəlxalq elmi mühitə inteqrasiyası üçün dünyanın nüfuzlu elm və təhsil müəssisələri ilə əlaqələrin qurulmasının vacibliyini bildirən R.Ələkbərov Alman Akademik Mübadilə Xidməti ilə keçirilən görüşlərin bu sahədə mühüm irəliləyişlərin əldə olunmasında önəmli rol oynayacağını qeyd etmişdir. O, həmçinin təcrübəli mütəxəssislərlə bu kimi seminar və treninqlərin keçirilməsinin vacibliyini vurğulamışdır.
AMEA rəyasət heyətinin mərkəzi aparatının beynəlxalq əlaqələr idarəsinin rəisi, professor Ədalət Həsənov akademiyada beynəlxalq əməkdaşlıq əlaqələrinin möhkəmləndirilməsi istiqamətində məqsədyönlü işlərin həyata keçirildiyini bildirmişdir. Ə.Həsənov Azərbaycanın və Almaniyanın elmi-tədqiqat institutları arasında körpü rolunu oynayan DAAD-ın gənc alimlər və elmi qurumların səmərəli fəaliyyəti üçün xüsusi əhəmiyyətini diqqətə çatdırmışdır.
Təmsil etdiyi təşkilat barədə ətraflı məlumat verən DAAD-ın Bakı Məlumat Mərkəzinin direktoru Nikola Uliş Almaniyanın aparıcı dövlət qurumunun dünyada tələbə və alimlərin beynəlxalq mübadiləsinə maliyyə dəstəyi verən ən böyük təşkilat olduğunu vurğulamışdır. O qeyd etmişdir ki, təşkilatın qlobal şəbəkəsi 14 regional ofis və 51 informasiya mərkəzindən ibarətdir. Fəaliyyətə başladığı ildən etibarən təşkilat Almaniya və digər ölkələrdən 1,5 milyondan çox alim və tələbəyə maliyyə dəstəyi göstərmişdir. Əsas məqsəd elmi mübadilə vasitəsilə xarici ölkələrlə akademik münasibətləri dəstəkləməkdən ibarətdir.
Bildirilmişdir ki, DAAD Almaniyanın elmi-tədqiqat institutları və ali məktəblərinə qəbul edilmiş tələbələrin maliyyə problemlərini həll etməklə yanaşı, tədqiqatçılar üçün bu ölkənin elm və təhsil müəssisələri ilə davamlı əməkdaşlıq əlaqələrinin qurulması və karyeraya başlamaq üçün geniş imkanlar yaradır.
Ali təhsilin bütün pillələri üçün proqramları nəzərdə tutan DAAD, həmçinin Almaniyada qısa və uzunmüddətli tədqiqatların aparılması üçün imkanlar təklif edir.
Sonra DAAD-ın proqramlarında iştirak etmək üçün qoyulan tələblər, elmi-tədqiqatın ilkin layihəsinin hazırlanması qaydası, layihələrin növləri, əsas tədqiqat sahələri və s. haqqında ətraflı məlumat verilmişdir.
Tədbirdə, həmçinin hər iki ölkənin müvafiq elmi-tədqiqat institutları ilə davamlı fəaliyyətin təşkili və alman təcrübəsinin öyrənilməsi istiqamətində birgə layihələrin həyata keçirilməsi, kadr və təcrübə mübadiləsi məsələləri ilə bağlı müzakirələr aparılmışdır.