Hakan Fidan: Ötən ilin ən əhəmiyyətli hadisələrindən biri Suriyada 61 illik rejiminin çökməsi oldu VİDEO
İstanbul, 10 yanvar, Günel Karatepe, AZƏRTAC
Ötən ilin ən əhəmiyyətli hadisələrindən biri şübhəsiz ki, Suriyada əli qana bulaşmış 61 illik rejimə son qoyulması oldu. Bu gün biz tarixin doğru tərəfində olmağımızla fəxr edirik. Artıq Suriya xalqı yeni bir hekayə ilə üz-üzədir. Biz Suriyanın yenidən qurulması və gələcəyi üçün səylərimizi başlatmışıq. Türkiyənin xarici siyasətinin əsas oxu rifah və sülhdür. Suriya ərazisinin terrordan təmizlənməsi 2025-ci ilin əsas fəaliyyəti olacaq. Türkiyə terrorla ən effektiv mübarizə aparan ölkədir və bu işdə qərarlıdır. Bölgədəki terror təşkilatları üçün artıq yolun sonu gəlib. Terrorun dini və milli mənsubiyyəti yoxdur. Terror təşkilatları üçün Avropa ilə Amerika arasında da heç bir fərq yoxdur. Terrorsuz Türkiyə hədəfimizə nail olacağıq. Türkiyə gələcəyini təhlükə altına qoyan bütün təhdidləri mənbəyində aradan qaldıracaq güc və qətiyyətə sahibdir. Heç nə əvvəlki kimi olmayacaq. Terrorla mübarizədə qeyri-müəyyən mövqe sərgiləyən ölkələr də terror hücumlarından dərs götürməlidir.
AZƏRTAC xəbər verir ki, bu fikirləri xarici işlər naziri Hakan Fidan Türkiyədəki yerli və beynəlxalq media nümayəndələri üçün keçirdiyi mətbuat konfransında ifadə edib. Nazir Türkiyə-ABŞ münasibətləri ilə bağlı sualı da cavablandırıb: “Türkiyə və ABŞ strateji baxımdan bir-birinə ehtiyacı olan iki ölkədir. Bu dövrdə ölkələr arasında strateji əməkdaşlıq çox vacibdir. Biz bu kontekstdə yeni Amerika administrasiyası ilə konstruktiv və açıq dialoqu davam etdirəcəyik. Biz Trampın ölkəmizin regionda və qlobal miqyasda təsiri ilə bağlı sözlərini diqqətə alırıq”.
Hakan Fidan PKK/YPG terror təşkilatının fransız əsgərlərini sərhədə yerləşdirmək çağırışına dair suala isə belə cavab verib: “Amerikanın olmadığı bir yerdə özləri bölgəyə gəlib əməliyyat və ya hərbi qüvvə yerləşdirə bilirlərsə, görək necə olur. Bunun belə olmadığını yaxşı bilirik. Amerikanın gücündən istifadə edərək öz maraqlarını irəli sürməkdən danışan və onun arxasında gizlənən ölkələri nəzərə almırıq. Bununla bağlı həmsöhbətimiz Amerikadır. Onun arxasında duran ölkələr deyil”.
Türkiyə-Avropa İttifaqı münasibətlərinə toxunan nazir bu münasibətlərin ikitərəfli səviyyədə yaxşı olduğunu, lakin Aİ qurumları ilə eyni səviyyədə işləmədiyini bildirib: “İttifaqa üzvlük prezidentimizin xarici siyasətdə qarşıya qoyduğu məqsəd olaraq qalmaqdadır. Bununla bağlı vəziyyət 10 il əvvəl fərqli nöqtəyə qədər gəlmişdi. Biz siyasi baxımdan heç bir dəyişiklik müşahidə etmirik. Qalan açıq nöqtələrdə münasibətləri necə irəli apara biləcəyimizi düşünürük. Buna viza sərbəstliyi və gömrük məsələləri də daxildir”.
Rusiya ilə Ukrayna arasında davam edən müharibəni xatırladan nazir burada gecikmiş sülhün olduğunu da deyib.
Bölmənin digər xəbərləri
