Rusiya ilə müharibədən əziyyət çəkən sadə odessalılar - REPORTAJ VİDEO
Odessa, 30 iyun, AZƏRTAC
Rusiyanın Ukraynaya qarşı başladığı müharibə nəticəsində minlərlə mülki insan soyqırımına məruz qalıb. Ən çox zərər çəkən, həlak olan və xəsarət alanlar da məhz dinc sakinlər olub. Bu baxımdan, Ukraynanın Qara dəniz sahilində yerləşən və turistlərin sevimli məkanına çevrilmiş Odessa şəhəri də müharibənin ən çox təsir etdiyi şəhərlərdən biridir.
AZƏRTAC-ın çəkiliş qrupu Odessaya yollanaraq, şəhərdə Rusiya ordusunun mülki infrastruktura və yaşayış binalarına endirdiyi hava hücumları, həlak olan insanlar, başsız qalan ailələr və müharibənin acısını yaşayan sakinlər barədə hadisə yerində araşdırma aparıb.
Ukraynaya qarşı müharibə başladığı vaxtdan etibarən Odessa şəhəri və ətraf ərazilər dəfələrlə Rusiya silahlı qüvvələrinin, xüsusilə də Qara dənizdə yerləşən Rusiya Hərbi Dəniz Qüvvələrinin döyüş gəmilərindən artilleriya atəşinə və hava zərbələrinə məruz qalıb. Şəhərə dəfələrlə ballistik və qanadlı raketlərlə hava hücumları həyata keçirilib. Odessada müşahidə olunan vəziyyət göstərir ki, dağıdılan və viran qoyulan mülki obyektlərin sayı kifayət qədər çoxdur. Hərbi obyektlərin olmadığı yaşayış məntəqələri belə dron və raket hücumlarına hədəf olur. Şəhər sakinləri Rusiyanın mülki əhaliyə qarşı törətdiyi vəhşiliklərdən və bu ağır durumdan artıq bezib və yorulublar.
Odessa şəhər sakini Tatyana Vovyanko AZƏRTAC-a açıqlamasında bildirib ki, müharibə ən çox mülki əhaliyə ağır təsir göstərib. “Hər gün, - təkcə cəbhə xəttində deyil, döyüşlərin getmədiyi şəhərlərdə də, - raketlər və dronlar havada dolaşır. İnsanlar gecələr rahat yata bilmirlər. Hər birimiz öz faciəmizi daxilən yaşayırıq, doğmalarımız və yaxınlarımız üçün daim narahatıq. Düşünürəm ki, ölkə xaricində olanlar da bu ağrını bizimlə bölüşürlər. Bəzən ən dəhşətlisi, müharibə şəraitində sağ qalmaq olur. Bu itkilər içində insanlar dərk edirlər ki, sülh və Vətənin qorunması uğrunda mübarizə nə qədər vacibdir. Hər kəs öz imkanları daxilində dəstək olmağa çalışır - bəziləri yardımlar göndərir, bəziləri xidmət göstərir, bəziləri isə ianə edir. Biz istəyirik ki, müdafiə, barış və sülh naminə daha çox insan bu işə qoşulsun. Ən əsası isə, nəhayət, təkcə Ukraynada deyil, bütün dünyada sülh olsun”.
Raketin zərbəsindən dağılan və xoşbəxtlikdən sağ qalan şəhər sakini Viktor Yorj isə AZƏRTAC-a bildirib ki, 2022-ci ilin aprelin 23-də Pasxa bayramı öncəsi atılan raketin qalığının yaşadığı binaya düşməsi nəticəsində ikinci mərtəbədən yeddinci mərtəbəyə qədər olan evlər dağılıb. “Çox evlər ziyan gördü, 7 nəfər həlak oldu. Sözsüz ki, sülh istərdik, ancaq hələ ki, bu, real görünmür”, - deyə Viktor Yorj əlavə edib.
Valentina Viktyuk isə AZƏRTAC-a açıqlamasında Rusiyanın mülki insanları hədəf götürməkdən bezdiyini vurğulayaraq deyib: “Artıq bütün baş verənlərdən bezmişik, uşağımızla hər dəfə gecə saat 00:00-dan sığınacağa qaçırıq. Bu dəhşətlidir, gecələri yatmırıq, mülki insanlar həlak olur. Bütün bunlar nə vaxt yekunlaşacaq? Biz bunun tez bir zamanda bitməsini istəyirik. Çünki bütün bunlar artıq bizi çox yorub. Bu, hamımıza təsir edir”.
Qeyd edək ki, Rusiyanın Ukraynaya qarşı başladığı müharibə zamanı Ukraynanın 13 mindən çox mülki şəxsi həlak olub. Onlardan 600-dən çoxu uşaqdır. Lakin bu statistika Ukraynanın işğal altındakı ərazilərində aparılmadığından, real itkilərin daha çox olduğunu söyləmək olar.
AZƏRTAC-ın xüsusi müxbiri
Odessa
Bölmənin digər xəbərləri
