Xocavənd kəndində yeni həyatın ilk sədaları VİDEO
Xocavənd, 27 fevral, AZƏRTAC
Xocavənd rayonunun Xocavənd kəndinin başı dumanlı dağları sanki bir az da dikəlib, torpağı isə illərin intizarından sonra doğma nəfəslə isinməyə başlayıb. Bu gün Xocavənd kəndində təkcə evlərin qapısı açılmır, həm də bütöv bir kəndin taleyi yenidən yazılır.
Prezident İlham Əliyevin, birinci xanım Mehriban Əliyevanın və Arzu xanım Əliyevanın fevralın 22-də bu kəndə gəlməsi sakinlər üçün sadəcə bir səfər deyil, yeni həyatın müjdəsidir. 2023-cü ilin sentyabrındakı antiterror əməliyyatından sonra azad nəfəs alan bu torpaqlar indi böyük quruculuq meydanını xatırladır.
AZƏRTAC-ın müxbiri bu tarixi anlara şahidlik etmək üçün Xocavənd kəndinə baş çəkib.
Kəndin yeni asfaltlanmış yolları ilə addımlayarkən müşahidə edirik ki, hər addımda bir canlanma var. Kənddəki 278 evin hər biri tarixin şahididir. Onlardan 128-i yararsız, 150-si isə qismən yararlıdır. Qismən yararlı evlərin 20-si artıq təmir olunub. Bərpa edilən evlərin pəncərələrindən axşamın alatoranında isti ocağın işığı süzülür. Cari ilin sonunadək daha 130 evin divarlarında quruculuq nəfəsi duyulacaq.
Kəndə yeni köçmüş ailələr illərlə həsrətini çəkdikləri evlərinə yerləşib, həyət-bacanı qaydaya salıb, sanki hər bir daşa, hər bir kola yenidən can veriblər. Göy üzündən süzülən narın yağış illərin tozunu-torpağını silib aparır, dağların ətəyinə çökmüş dumanlı hava kəndin bərpa edilən mənzərəsinə əlavə bir rəng qatırdı. Bu rütubətli və bərəkətli havada həyətlərdəki ağacların çiçək açması, ruzi-bərəkət rəmzi olan səmənilərin pəncərə önlərini bəzəməsi Xocavəndin hər qarışında yeni və firavan bir həyatın başladığından xəbər verirdi.
Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsinin müdiri vəzifəsini icra edən Fidan Məmmədova ilə söhbət edirik. Deyir ki, bu ilin fevralında Xocavənd kəndinə 20 ailə - 94 nəfər qayıdıb. Cari ilin mart-dekabr aylarında kəndə daha 130 ailə - 533 nəfərin qayıtması planlaşdırılır. Bu, sadəcə statistik rəqəm deyil, bu, 533 gülümsəyən üz, 533 yeni ümid deməkdir.
Ötən müddət ərzində kənddə bir sıra sosialyönümlü işlər görülüb. Belə ki, 5 kilometr uzunluğunda daşıyıcı qaz xətti çəkilib, 1500 metr uzunluğunda mövcud xətt bərpa edilib. Bundan başqa, 2100 metr uzunluğunda 0,4 kV-luq mövcud xətlər və 2 transformator məntəqəsi bərpa olunub. Kənddaxili yollar asfaltlanıb, piyada yolları çəkilib. Hazırda bu istiqamətdə işlər davam etdirilir.
Reportajımızı bitirib kənddən ayrılarkən arxaya boylanırıq - Xocavənd artıq xəritədəki soyuq bir ad deyil. O, indi asfalt yolları, bərpa edilmiş evləri və ən əsası, qayıdan sakinləri ilə yeni həyata başlayan Vətən torpağıdır. Alovun istisi tonqalı isitdiyi kimi, dövlətin qayğısı da bu kəndin soyuq daşlarını artıq Vətən hərarəti ilə isidib.
Bölmənin digər xəbərləri
