Yaşıl zəmilərin al-qırmızı gözəli: İsmayıllıda lalə mövsümü FOTOLAR VİDEO
İsmayıllı, 27 may, AZƏRTAC
Yaz fəslində Azərbaycanın bölgələri sanki rəssam fırçasından çıxmış canlı tabloya çevrilir. Xüsusilə Bakı–Şamaxı–Yevlax avtomobil yolunun İsmayıllı rayonundan keçən hissəsində uzanan yaşıl taxıl zəmilərinin arasından boylanan al-qırmızı lalələr əraziyə fərqli bir gözəllik bəxş edir.
AZƏRTAC-ın bölgə müxbiri xəbər verir ki, yolboyu yaranan bu ecazkar mənzərə həm yerli sakinlərin, həm də bölgədən keçən qonaqların böyük marağına səbəb olur. Sürücü və sərnişinlər avtomobillərini saxlayaraq təbiətin bu gözəlliyini seyr edir, həmin anları telefonlarının yaddaşına köçürərək unudulmaz xatirəyə çevirirlər.
Sürücü Sabəli Mirzəyev yolda olarkən İsmayıllı ərazisində qarşılaşdığı bu mənzərəyə biganə qala bilmədiyini vurğulayır: “Yazın ən gözəl mənzərələrindən biri məhz buradadır. Bu ecazkar görüntünü seyr etmədən və şəkil çəkdirmədən yoluna davam etmək demək olar ki, qeyri-mümkündür”.
Bakı–Şamaxı–Yevlax magistralının İsmayıllıdan keçən hissəsində açan lalələr sosial şəbəkələrdə də böyük trendə çevrilib. Bu gözəllik əraziyə xüsusi turların təşkil olunmasına zəmin yaradıb. Əsasən paytaxt sakinləri həftəsonlarını təbiət qoynunda keçirmək və yazın rənglərini yaxından görmək üçün bu turlara böyük maraq göstərirlər.
Paytaxt sakini Arzu Quluyeva bildirir ki, iş həftəsinin yorğunluğunu atmaq və ailəsi ilə birlikdə xoş vaxt keçirmək üçün məhz “lalə turu”nu seçib: “Yaşıl taxıl zəmilərinin arasında açan qırmızı və sarı lalələrin harmoniyası insana xüsusi zövq və daxili hüzur verir”.
Tur rəhbəri Azad İmamquluyev isə qeyd edir ki, daxili turizmdə artıq təbiətlə iç-içə olan konseptlərə tələbat kəskin artıb: “İnsanlar şəhərin səs-küyündən uzaqlaşıb təbii gözəlliklərə can atırlar. Buna görə də bu cür mənzərəli ərazilərə təşkil etdiyimiz turların sayı mütəmadi olaraq artmaqdadır”.
Təbiətin yaratdığı bu gözəllik insanlara xoş ovqat bəxş etsə də, fermerlər əkin sahələrinin qorunmasının vacibliyini xatırladırlar. Fermer Hikmət Hacısalmanov bəzi vətəndaşların məsuliyyətsiz davranışından narahatlığını gizlətmir. “Şəkil çəkdirmək istəyən bəzi şəxslər taxıl sahələrinin içinə daxil olur, nəticədə yaşıl zəmilər tapdalanır və məhsula ciddi ziyan vurulur. Biz vətəndaşlarımızdan xahiş edirik ki, şəkilləri sahələrin kənar hissəsindən, əkinlərə zərər vurmadan çəksinlər”, - deyə o əlavə edib.
Mütəxəssislər də bildirirlər ki, təbiətin gözəlliyindən zövq almaqla yanaşı, kənd təsərrüfatında çəkilən əməyə hörmətlə yanaşmaq və ekoloji tarazlığı qorumaq vacibdir. Əkin sahələrinə zərər vermədən və yol kənarında təhlükəsizlik qaydalarına tam əməl etməklə bu mənzərələrin dadını çıxarmaq mümkündür.
Bir sözlə, Bakı–Şamaxı–Yevlax avtomobil yolunun İsmayıllı rayonundan keçən hissəsində açan lalələr yazın ən parlaq vizual vizit kartına çevrilib. Bu rəngarəng görüntü həm bölgəyə gələn turistlərə unudulmaz anlar yaşadır, həm də Azərbaycan təbiətinin zəngin potensialını bir daha göz önünə sərir.
Müxbir- Rəşad Türkoğlu
Bölmənin digər xəbərləri
